काठमाडौँ । यमपञ्चकको पाँचौँ तथा अन्तिम दिन आज देशभर दाजुभाइ र दिदीबहिनीहरूले उत्साहका साथ भाईटीका लगाइरहेका छन्। दिदीबहिनीले आफ्ना दाजुभाइको दीर्घायु, आरोग्य र समृद्धिको कामना गर्दै अष्टचिरञ्जीवी र यमराजको पूजा गरी सप्तरङ्गी टीका र मखमली, सयपत्री तथा गोदावरीको माला लगाइदिने क्रम जारी छ।
नेपाल पञ्चाङ्ग निर्णायक विकास समितिले आज बिहान ११:०७ बजेको समय टीकाका लागि उत्तम साइत निर्धारण गरे पनि दिनभर नै टीका लगाउन सकिने जनाएको छ। टीका लगाउँदा दाजुभाइ पश्चिम फर्कने र दिदीबहिनी पूर्व फर्कने शास्त्रीय विधि रहेको छ।
दिदीबहिनीहरूले दाजुभाइलाई तेलको धाराले घेरेर, ओखर फुटाएर यमराजको भयबाट मुक्तिको कामना गर्दै भाइपला, ओखर, कटुस, र विभिन्न मसलाका साथै भाइमसला र सेलरोटी खुवाउने गर्छन्।
बदलामा दाजुभाइले पनि दिदीबहिनीलाई टीका र माला लगाइदिएर आफ्नो क्षमताअनुसार वस्त्र, दक्षिणा र उपहार दिई सम्मान व्यक्त गरिरहेका छन्।
यसैबिच, दिदीबहिनी वा दाजुभाइ नहुनेहरूका लागि काठमाडौँको रानीपोखरीस्थित बालगोपालेश्वर मन्दिर आज दिनभर खुल्ला गरिएको छ। बिहानैदेखि सो मन्दिरमा पुगेर दाजुभाइ तथा दिदीबहिनी नहुनेहरूले टीका ग्रहण गरिरहेका छन्।उपत्यकालगायत देशका विभिन्न भागमा नेवार समुदायले आजै किजापूजा पनि मनाइरहेका छन्। तिहारको यस अन्तिम दिनले दाजुभाइ र दिदीबहिनीबिचको आत्मीय सम्बन्ध र पारिवारिक एकतालाई अझ प्रगाढ बनाएको छ।
