जन्मजात जटिल स्वास्थ्य समस्या (ग्यास्ट्रोस्किसिस) देखिएपछि वीरगञ्जस्थित नारायणी अस्पतालमा जन्मिएका एक नवजात शिशुलाई थप उपचारका लागि काठमाडौंस्थित कान्ति बाल अस्पताल रेफर गरिएको छ।
अस्पताल प्रशासनले जारी गरेको प्रेस विज्ञप्तिअनुसार बाराको इटियाही–०७ निवासी २० वर्षीया गुड्डी कुमारीलाई गत कार्तिक २२ गते बेलुका ६:२८ बजे सुत्केरी व्यथा लागेपछि नारायणी अस्पताल भर्ना गरिएको थियो। राति ११:२० बजे भर्ना भएकी गुड्डी कुमारीले सोही राति ११:३८ बजे शल्यक्रिया (एलएससीएस) मार्फत तीन किलोग्राम तौल भएको छोरालाई जन्म दिएकी थिइन्।
शिशुको जन्मपश्चात् स्वास्थ्य परीक्षण गर्दा पेटको भित्ताबाहिर आन्द्रा निस्किने गम्भीर जन्मजात समस्या ‘ग्यास्ट्रोस्किसिस’ (Gastroschisis) पुष्टि भएको अस्पतालले जनाएको छ। यस्तो जटिल अवस्थाका नवजात शिशुलाई तत्काल नवजात शिशु सघन उपचार कक्ष (एनआईसीयू) तथा बाल शल्यचिकित्सा (पेडियाट्रिक सर्जरी) सेवाको आवश्यकता पर्छ।
उक्त उपचार नारायणी अस्पतालमा सम्भव नभएकाले सुरुमा शिशुलाई नेसनल मेडिकल कलेज लगिएको थियो। तर, पुनः नारायणी अस्पताल ल्याइएका शिशुलाई प्राथमिक उपचार तथा स्वास्थ्य अवस्था स्थिर गराएर थप उच्चस्तरीय शल्यक्रियाका लागि कार्तिक २३ गते दिउँसो १ बजे काठमाडौंको कान्ति बाल अस्पताल पठाइएको हो।
नारायणी अस्पताल प्रशासनले शिशुको सफल उपचार तथा शीघ्र स्वास्थ्यलाभको कामना गर्दै यस्ता जटिल जन्मजात स्वास्थ्य समस्याको समयमै पहिचान र उचित व्यवस्थापनका लागि अस्पताल सदैव प्रतिबद्ध रहेको जनाएको छ।
