वीरगञ्ज १५ कार्तिक । बाराको फेटा गाउँपालिका–३ स्थित निर्माणाधीन आधारभूत अस्पताल उद्घाटन गर्ने विषयलाई लिएर भएको विवाद, प्रदर्शन र झडपको निष्पक्ष छानबिन गर्न मधेस प्रदेश प्रहरी कार्यालयले तीन सदस्यीय छानबिन टोली गठन गरेको छ। घटनामा प्रहरीको गोली लागेर एक किशोर गम्भीर घाइते भएपछि प्रहरी प्रशासनले छानबिन प्रक्रिया अघि बढाएको हो।
प्रहरी वरिष्ठ उपरीक्षक (एसएसपी) प्रभु प्रसाद ढकालको नेतृत्वमा गठित छानबिन टोलीमा प्रहरी उपरीक्षक (एसपी) भुनेश्वर प्रसाद साह र प्रहरी निरीक्षक जटा शंकर यादव सदस्य रहेका छन्। टोलीलाई घटनास्थलमै पुगेर विवाद उत्पन्न हुनुको कारण, प्रदर्शनका क्रममा भएको झडप, प्रहरीको बल प्रयोग तथा घटनाको समग्र परिस्थितिबारे अनुसन्धान गरी प्रतिवेदन पेस गर्ने जिम्मेवारी दिइएको छ।
घटनालाई लिएर प्रहरी संगठनभित्र पनि जिम्मेवारी हेरफेर गरिएको छ। इलाका प्रहरी कार्यालय प्रसौनीका प्रमुख प्रहरी निरीक्षक सुमन लामालाई जिम्मेवारीबाट हटाएर जिल्ला प्रहरी कार्यालय बारामा तानिएको छ। एसपी नरेन्द्र कुँवरका अनुसार लामाको स्थानमा प्रहरी निरीक्षक राजाबाबु ठाकुरलाई प्रसौनीको कार्यालय प्रमुखका रूपमा खटाइएको छ।
फेटा गाउँपालिका–३ मा निर्माणाधीन १५ शय्याको आधारभूत अस्पताल पूर्ण रूपमा निर्माण सम्पन्न नभइसकेको अवस्थामा उद्घाटन गर्न खोजिएको भन्दै स्थानीयवासीले शनिबार विरोध प्रदर्शन गरेका थिए। अधुरो संरचनाको उद्घाटन गर्न खोजिएको भन्दै सुरु भएको विरोध प्रदर्शन विस्तारै चर्किँदै गएपछि प्रहरी र प्रदर्शनकारीबीच झडप भएको थियो।
झडपका क्रममा प्रहरीले चलाएको गोली लागेर स्थानीय धर्मेन्द्र पासवानका करिब १५ वर्षीय छोरा आदित्य पासवान गम्भीर घाइते भएका छन्। उनको तिघ्रामा गोली लागेको बताइएको छ। घाइते किशोरको वीरगञ्जस्थित नेशनल मेडिकल कलेजमा उपचार भइरहेको छ।
प्रहरीको गोली लागेर किशोर घाइते भएपछि आक्रोशित बनेका स्थानीयवासीले अस्पताल परिसरमा ढुंगामुढा तथा तोडफोड गर्नुका साथै करिब नौवटा मोटरसाइकलमा आगजनी गरेका थिए। उक्त झडपमा पाँच जना प्रहरीसमेत घाइते भएका थिए।
घटनाले स्थानीय प्रशासन र प्रहरीको सुरक्षा व्यवस्थापनमाथि समेत प्रश्न उठाएको छ।
विशेषगरी निर्माण सम्पन्न नभएको अस्पताल उद्घाटन गर्न खोज्दा विवाद कसरी हिंसात्मक अवस्थामा पुग्यो, प्रदर्शन नियन्त्रण गर्ने क्रममा प्रहरीले किन गोली चलाउनुपर्ने अवस्था आयो र बल प्रयोग आवश्यक तथा कानुनसम्मत थियो वा थिएन भन्ने विषय अहिले चासोको केन्द्र बनेको छ।
अब गठन भएको छानबिन टोलीले घटनाको वास्तविक कारण, प्रहरीको भूमिका, बल प्रयोगको औचित्य तथा झडपमा संलग्न पक्षहरूको गतिविधिबारे कस्तो निष्कर्ष निकाल्छ भन्ने विषय महत्वपूर्ण बनेको छ। साथै, गोली लागेर घाइते भएका किशोरको घटनामा जिम्मेवारी र जवाफदेहिताको विषयमा समेत स्थानीयवासीले चासो राखेका छन्।
छानबिन प्रतिवेदनले घटनाको वास्तविकता सार्वजनिक गर्नुका साथै भविष्यमा यस्ता घटना दोहोरिन नदिन आवश्यक कदम चाल्न प्रहरी प्रशासनलाई सहयोग पुग्ने अपेक्षा गरिएको छ।
