२१ असोज, २०८३ (७ अक्टोबर, २०२६)
काठमाडौँ। नेपाली कांग्रेसका नेता डा. मिनेन्द्र रिजालले पार्टीको १५औँ महाधिवेशन अन्तर्गत खुला उपसभापति पदमा दिएको उम्मेदवारी फिर्ता लिने घोषणा गर्नुभएको छ। मङ्गलबार साँझ सभापतिका उम्मेदवार गगनकुमार थापासँगको गहन छलफलपछि उहाँ उम्मेदवारी फिर्ता लिने र थापाको नेतृत्वलाई समर्थन गर्ने निर्णयमा पुग्नुभएको हो।
डा. रिजालले थापासँगको भेटवार्ताको भिडियो सामाजिक सञ्जालमा समेत सार्वजनिक गर्दै कांग्रेसलाई आफ्नै मूल मर्म र पहिचानमा फर्काउन आफूले उम्मेदवारी फिर्ता लिने निर्णय लिएको स्पष्ट पार्नुभएको छ। भेटका क्रममा उहाँले पार्टीको हित र रूपान्तरणका लागि गगन थापाको यात्रामा निरन्तर साथ दिने प्रतिबद्धता व्यक्त गर्नुभयो।
थापासँगको छलफलमा डा. रिजालले कांग्रेसले आफ्नो वास्तविक आत्मा र हृदय पुनः प्राप्त गरोस् भन्ने नै आफ्नो एकमात्र आकांक्षा रहेको बताउनुभयो। पद भन्दा पनि पार्टीको रूपान्तरण मुख्य विषय भएकाले आफूले पद खोज्ने यात्रा अन्त्य गर्दै औपचारिक रूपमा उम्मेदवारी फिर्ता लिने जानकारी गराउनुभएको थियो।
केन्द्रीय निर्वाचन समितिले तोकेको समयतालिका अनुसार डा. रिजालले बुधबार औपचारिक रूपमा आफ्नो मनोनयन फिर्ता लिँदै हुनुहुन्छ। उहाँको यो निर्णयसँगै खुला उपसभापति पदको चुनावी समीकरणमा नयाँ तरङ्ग पैदा भएको छ।
