नवलपरासी पूर्वको गैँडाकोट नगरपालिका–१० स्थित अकलामाई मन्दिर नजिकै अचेत अवस्थामा फेला परेका दुई महिलाको मृत्यु भएको छ।
पूर्व–पश्चिम राजमार्गको बायाँपट्टि मन्दिर नजिकैको चौरमा दुई महिला अचेत अवस्थामा रहेको सूचना पाउनासाथ प्रहरी टोली घटनास्थलमा पुगेको थियो। प्रहरीले तत्काल दुवै जनाको उद्धार गरी भेडाबारीस्थित नगर अस्पताल पुर्याए पनि उपचारका क्रममा चिकित्सकले दुवैलाई मृत घोषणा गरेका हुन्।
मृतकको पहिचान
प्रहरीका अनुसार मृत्यु हुनेमा:
-
कविता राई (३८ वर्षीया): बागलुङको जैमिनी नगरपालिका–९ घर भई हाल गैँडाकोट नगरपालिका–१२ हर्कपुरमा डेरा गरी ज्याला मजदुरी गर्दै आएकी।
-
कान्छी राई (करिब ४५ वर्षीया): भोजपुर घर भई हाल गैँडाकोट नगरपालिका–१० पितौजीस्थित गाई फार्ममा काम गर्दै आएकी।
घटनास्थलमा बियरका बोतल र कुरमुरेका प्याकेट फेला
इलाका प्रहरी कार्यालयका अनुसार घटनाको प्रारम्भिक अनुसन्धानका क्रममा घटनास्थलबाट बियरका खाली बोतल र कुरमुरेका प्याकेटहरू फेला परेका छन्।
मृतक दुवै महिलाको शरीरमा बाहिर कुनै चोटपटक नदेखिएको र मृत्युको वास्तविक कारण पत्ता लगाउन शव परीक्षण (पोस्टमार्टम) को तयारी भइरहेको प्रहरीले जनाएको छ। घटनाका सम्बन्धमा थप अनुसन्धान अघि बढाइएको छ।
