सुनसरीको देवानगञ्ज गाउँपालिका-३, कप्तानगञ्जमा प्रहरीको गोली लागेर एक युवकको मृत्यु भएपछि उत्पन्न तनाव साम्य पार्न डाकिएको सर्वदलीय बैठक निष्कर्षमुखी हुनुको सट्टा सुरक्षा निकायका अधिकारी हटाउनेतर्फ मोडिएको छ।

दुई समुदायबिचको झडप र त्यसपछिको स्थिति नियन्त्रणमा लिने प्रयास गर्दा भएको घटनापछि जिल्ला प्रशासन कार्यालय इनरुवामा सर्वदलीय बैठक बसिरहेको छ। तर, समस्याको दीर्घकालीन समाधानमा जुट्नुको साटो सत्तापक्षीय तथा विपक्षी राजनीतिक दलहरू सुनसरीका प्रमुख जिल्ला अधिकारी (सीडीओ) र जिल्ला प्रहरी प्रमुख (एसपी) लाई हटाउनुपर्ने मागमा केन्द्रित भएका छन्।

रास्वपाद्वारा प्रजिअ र एसपी हटाउन माग

बैठकमा सहभागी राष्ट्रिय स्वतन्त्र पार्टी (रास्वपा) सुनसरीका सचिव राजाराम मेहताले प्रमुख जिल्ला अधिकारी वासुदेव घिमिरे र जिल्ला प्रहरी प्रमुख एसपी केशव थेबेलाई तत्काल जिल्लाबाट हटाउनुपर्ने माग राखेका थिए।

प्रशासन र प्रहरीको भूमिका सुरुदेखि नै विवादास्पद रहेको दाबी गर्दै उनले निष्पक्ष छानबिनका लागि दुवै जिम्मेवार अधिकारीलाई हटाउनुको विकल्प नरहेको धारणा राखे। उनको यस मागमा रास्वपाका अन्य नेताहरूले पनि समर्थन जनाएका छन्।

सर्वदलीय बैठकका निर्णयहरू

काङ्ग्रेस सुनसरीका सचिव वीरेन्द्र शाहका अनुसार बैठकमा मुख्य गरी देहायका विषयमा छलफल तथा आग्रह गरिएको छ:

• निष्पक्ष छानबिन: घटनाको सत्यतथ्य पत्ता लगाउन गृह मन्त्रालयले छानबिन समिति गठन गरिसकेकाले निष्पक्ष छानबिन गर्ने।

• कारबाही र क्षतिपूर्ति: घटनाका दोषीमाथि कडा कानुनी कारबाही गर्ने र पीडित परिवारलाई उचित क्षतिपूर्ति उपलब्ध गराउने।

• सद्भाव कायम राख्ने: जिल्लामा शान्ति-सुरक्षा र सामाजिक सद्भाव कायम राख्न सबै राजनीतिक दल, नागरिक समाज र स्थानीयवासीलाई संयमित हुन आग्रह गर्ने।

गृह मन्त्रालयले घटनाको सत्यतथ्य छानबिन गर्न समिति गठन गरिसकेको छ भने स्थानीय प्रशासनले स्थिति थप बिग्रन नदिन र शान्ति सुरक्षा कायम राख्न सबै पक्षसँग सहयोग र संयमताको अपिल गरेको छ।