११ साउन, विराटनगर । सुनसरीको देवानगञ्ज गाउँपालिका-३, कप्तानगन्जमा दुई समूहबीचको विवाद नियन्त्रणमा लिने क्रममा प्रहरीको गोली लागेर एक युवकको मृत्यु भएपछि स्थानीय प्रशासनले कर्फ्यु आदेश जारी गरेको छ।
सुनसरीका प्रमुख जिल्ला अधिकारी बासुदेव घिमिरेको अध्यक्षतामा आइतबार राति बसेको सुरक्षा समितिको बैठकले सुनसरीको दक्षिण क्षेत्रमा पर्ने पाँचवटा प्रमुख बजार र आसपासका क्षेत्रमा सोमबार बिहान ७ बजेदेखि लागू हुने गरी अर्को सूचना जारी नभएसम्मका लागि कर्फ्यु (निषेधाज्ञा) जारी गरेको हो। कर्फ्यु लगाइएको क्षेत्रमा हिँडडुल गर्न, भेला हुन, जुलुस निकाल्न र सभा गर्न पूर्ण रूपमा रोक लगाइएको छ।
बोलबम यात्राको विवादले लियो हिंसात्मक रूप
प्रहरीका अनुसार आइतबार राति युवाहरूको एक समूह डिजे (DJ) बजाउँदै साउने सोमबारको बोलबम यात्राका लागि सप्तकोशी नदीतर्फ जाने तयारीमा थियो। सोही क्रममा अर्को समूहले रातिको समयमा होहल्ला र ध्वनि प्रदूषण भएको भन्दै अवरोध गर्न खोजेपछि दुई पक्षबीच विवाद सुरु भएको थियो।
उक्त विवाद बढ्दै गएर झडप र हिंसात्मक रूप लिएपछि स्थिति नियन्त्रणमा लिन प्रहरीले गोली चलाएको थियो। प्रहरीको गोली लागेर स्थानीय २४ वर्षीय ओमप्रकाश मेहताको मृत्यु भएको छ भने अन्य ८ जना प्रदर्शनकारी घाइते भएका छन्, जसमध्ये केहीको अवस्था गम्भीर रहेको छ।
कहाँ-कहाँ लाग्यो कर्फ्यु? (सीमा क्षेत्रको विवरण)
थप दुर्घटना हुन नदिन र शान्ति सुरक्षा कायम राख्न प्रशासनले हरिनगर गाउँपालिका र देवानगञ्ज गाउँपालिका क्षेत्रभरि नै निषेधाज्ञा जारी गर्दै मुख्य ५ बजार क्षेत्रको सीमा तोकेर कर्फ्यु लगाएको छ:
कप्तानगंज बजार क्षेत्र: पूर्वतर्फ यादव टोल, पश्चिमतर्फ पाँचौ सिमल मावि, उत्तरतर्फ कृष्ण मावि र दक्षिणतर्फ नेपाल-भारत सीमा क्षेत्रसम्म।
देवानगंज बजार क्षेत्र: पूर्वतर्फ विराटनगर जाने बाटोको मुसहर टोल, पश्चिमतर्फ मोरीया खोला, उत्तरतर्फ चिउरा मिल र दक्षिणतर्फ गाउँपालिकाको कार्यालयसम्म।
हरिनगरा बजार क्षेत्र: पूर्वतर्फ नूनिया टोल, पश्चिमतर्फ खुनिया धार, उत्तरतर्फ हरिनगर गाउँपालिका कार्यालय र दक्षिणतर्फ बसन्तपुर मोडसम्म।
भुटाहा बजार क्षेत्र: पूर्वतर्फ मोरीया धार खोला, पश्चिमतर्फ इदगाहा फिल्ड, उत्तरतर्फ सुनसरी खोला र दक्षिणतर्फ हरिनगर गाउँपालिका कार्यालयसम्म।
घुस्की बजार क्षेत्र: पूर्वतर्फ कासमिया मदरसा, पश्चिमतर्फ प्रहरी चौकी घुस्की, उत्तरतर्फ इशा हार्डवेयर र दक्षिणतर्फ हिलाल पब्लिक स्कुलसम्म।
हाल सोमबार बिहानबाट कप्तानगंज र आसपासका क्षेत्रको अवस्था सामान्य तर तनावपूर्ण रहेको छ। स्थानीय प्रशासनले ती क्षेत्रहरूमा सुरक्षा व्यवस्था अत्यन्तै कडा बनाएको छ र नागरिकहरूलाई संयमता अपनाउन अपिल गरेको छ।
