मोबाइल, इमेल र सामाजिक सञ्जालको व्यापक प्रयोगका कारण परम्परागत हुलाक सेवा सुस्ताएको ठानिए पनि कैलालीमा यसको प्रयोग अझै उल्लेख्य रहेको पाइएको छ। हुलाक निर्देशनालय कैलालीका अनुसार आर्थिक वर्ष २०८२/८३ मा मात्रै एक लाख २७ हजार ६२० वटा चिठीपत्र तथा हुलाक सामग्रीको सफल आयात-निर्यात भएको छ।
निर्देशनालयका सूचना अधिकारी अनिश तामाङका अनुसार आयात र निर्याततर्फ समान ६३ हजार ८१० वटा हुलाक सामग्री ओसारपसार गरिएका छन्, जसमा सबैभन्दा बढी ५२ हजार ६९९ वटा ‘रजिष्ट्री’ चिठीपत्र रहेका छन्। यसबाहेक ४७० वटा वैदेशिक पत्र र २४ घण्टाभित्र पुर्याइने द्रुत डाँक सेवा (EMS) मार्फत दुई हजार ७२३ वटा सामग्री आदानप्रदान भएका छन्। चिठीपत्र ओसारपसारका साथै सञ्चार माध्यमको नियमन, नवीकरण र टिकट बिक्रीबाट निर्देशनालयले वर्षभरिमा रु ६४ लाख ३१ हजार ९०३ राजस्वसमेत सङ्कलन गरेको छ।
सीमित स्रोतसाधन र जनशक्तिका बाबजुद आधुनिक प्रविधि र सुधारका नीति अघि बढाउँदै सेवा दिइरहेको हुलाक निर्देशक सिद्धराज जोशीले बताए। सरकारको नीतिअनुसार हुलाक सेवालाई थप आधुनिक, स्रोतसाधन सम्पन्न र सशक्त बनाउँदै लैजाने योजना निर्देशनालयको छ।
