अख्तियार दुरुपयोग अनुसन्धान आयोगले भूमिगत जलश्रोत तथा सिँचाइ विकास डिभिजन कार्यालय, सर्लाहीका डिभिजन प्रमुख अनुपमा ढकाल र मेकानिकल अधिकृत तुलाकान्त चौधरीलाई साढे सात लाख रुपैयाँ घुससहित रंगेहात नियन्त्रणमा लिएको छ। बर्दिबासबाट खटिएको अख्तियारको टोलीले बागमती नगरपालिका वडा नं. १२ स्थित डिभिजन प्रमुखको क्वार्टरबाट साउन ८ गते उनीहरूलाई पक्राउ गरेको हो। बोरिङ र मोटर जडानको कार्य सम्पन्न भइसकेपछि सोबापतको भुक्तानी दिने क्रममा सेवाग्राहीसँग रकम माग गरी दुःख हैरानी दिएको उजुरीका आधारमा अख्तियारले यो कारबाही अघि बढाएको थियो।
अख्तियारका प्रवक्ता सुरेश न्यौपानेका अनुसार पक्राउ परेका दुवै जनाको साथबाट घुसबापतको साढे सात लाख रुपैयाँका साथै स्रोत नखुलेको थप ७१ हजार ११५ रुपैयाँ र तीन थान मोबाइल फोनसमेत बरामद गरिएको छ। सेवाग्राहीबाट घुस लिइसकेको अवस्थामा नियन्त्रणमा लिइएका डिभिजन प्रमुख ढकाल र अधिकृत चौधरीमाथि थप अनुसन्धान भइरहेको आयोगले जनाएको छ।
