ताप्लेजुङको हिमाली बस्ती लेलेप छाडेर चार दशकअघि मधेस झरेका ७२ वर्षीय जहरमान लिम्बूको वर्षौँदेखिको एउटै सपना आफ्नो स्वामित्वमा एक टुक्रा जमिन हुनु थियो। आफूले भोगचलन गर्दै आएको भूमिको कानुनी स्वामित्व नहुँदा कुन दिन सरकारले उठिबास लगाउला भन्ने चिन्ता बोकेर जीवन बिताएका जहरमानको सपना अन्ततः साकार भएको छ। बिहीबार अर्जुनधारा नगरपालिकामा आयोजित कार्यक्रममा हातमा जग्गाधनी प्रमाण पुर्जा पर्दा उनी खुसीले भावुक बनेका थिए। जहरमानसँगै अर्जुनधारा–११ लक्ष्मीधापकी सपना सिवा दर्जी र उमादेवी तामाङसहित १७ जना अव्यवस्थित बसोबासीले जिल्ला भूमि समस्या समाधान समिति झापाबाट लालपुर्जा प्राप्त गरेका छन्।
कार्यक्रममा अर्जुनधारा नगरपालिकाकी उपप्रमुख खड्गमाया पराजुलीले आफू पनि अव्यवस्थित बसोबासीकै पृष्ठभूमिबाट आएकाले भूमिहीनको पीडा नजिकबाट बुझेको बताउँदै यो पुर्जा केवल एउटा कागजको टुक्रा नभई पुस्तौँदेखिको असुरक्षाको अन्त्य भएको उल्लेख गरिन्। प्रमुख अतिथि एवं प्रतिनिधिसभा सदस्य इन्दिरा रानाले पुर्जा हस्तान्तरण गर्दै जोखिमयुक्त बस्तीबाहेक कसैलाई पनि विस्थापित नगर्ने सरकारको नीति रहेको स्पष्ट पारिन्। अर्जुनधारा नगरपालिकाका प्रमुख बलदेवसिंह गोम्देन तामाङका अनुसार वडा नं ११ मा यसअघि नै १४४ जनाले लालपुर्जा पाइसकेका छन् भने पालिकाले ७२९ भूमिहीन सुकुमवासी, २१२ भूमिहीन दलित र छ हजार ३५९ अव्यवस्थित बसोबासीलाई पुर्जा वितरण गर्ने प्रक्रिया तीव्र रूपमा अघि बढाएको छ।
यस अभियानलाई छिटो निष्कर्षमा पुर्याउन प्राविधिक तथा प्रशासनिक कर्मचारीहरू सार्वजनिक बिदाका दिनसमेत खटिएका छन्। जिल्ला भूमि समस्या समाधान समिति झापाका अध्यक्ष एवं प्रमुख जिल्ला अधिकारी शिवराम गेलालले वास्तविक लाभग्राहीलाई मात्रै पुर्जा वितरण गर्न प्रशासन पूर्ण रूपमा सजग रहेको बताएका छन्। नापी कार्यालयका प्रमुख एवं समितिका सदस्यसचिव शिवप्रसाद लम्सालका अनुसार झापाका सबै स्थानीय तहमा पुर्जा वितरणको प्रक्रिया प्रारम्भ भइसकेको छ र सोही क्रममा मेचीनगरका पाँच जना अव्यवस्थित बसोबासीलाई पनि लालपुर्जा प्रदान गरिएको छ।
