काठमाडौँ — नक्कली भुटानी शरणार्थी प्रकरणको मुद्दामा काठमाडौँ जिल्ला अदालतबाट सफाइ पाएसँगै पूर्वगृहमन्त्री रामबहादुर थापा ‘बादल’का छोरा प्रतीक थापा आजै कारागारबाट मुक्त हुने भएका छन्।

केन्द्रीय कारागार कार्यालय जगन्नाथदेवलका अनुसार बुधबार उनलाई कारागारबाट छुटाउने कानुनी प्रक्रिया अगाडि बढाइएको छ।

अख्तियार र सम्पत्ति शुद्धीकरण विभागमा तारेखको प्रक्रिया जारी

केन्द्रीय कारागारका जेलर कृष्ण चापागाईंले प्रतीक थापाको कारागारतर्फको सम्पूर्ण प्रक्रिया सकिएको जानकारी दिनुभयो।

“अदालतले सफाइ दिएसँगै उहाँ छुट्दै हुनुहुन्छ। कारागारको प्रक्रिया सकिएर अहिले अख्तियार दुरूपयोग अनुसन्धान आयोग र सम्पत्ति शुद्धीकरण अनुसन्धान विभागबाट तारेखमा राख्ने प्रक्रिया भइरहेको छ,” जेलर चापागाईंले भन्नुभयो।

टोपबहादुर रायमाझीसहित १५ जना दोषी ठहर, ७ जनाले पाए सफाइ

मङ्गलवार काठमाडौँ जिल्ला अदालतका न्यायाधीश तेजबहादुर खड्काको इजलासले नक्कली भुटानी शरणार्थी प्रकरणमा ऐतिहासिक फैसला सुनाएको थियो। अदालतले पूर्व उपप्रधानमन्त्री टोपबहादुर रायमाझीसहित १५ जनालाई दोषी ठहर गरेको छ।

यसै प्रकरणमा आरोपित रहेका प्रतीक थापासहित ७ जनाले भने पूर्ण सफाइ पाएका छन्। सफाइ पाउनेहरूमा:

• प्रतीक थापा

• रामशरण केसी

• टंककुमार गुरूङ

• सन्दीप रायमाझी

• लक्ष्मी महर्जन

• केशव तुलाधर

• आशिष बुढाथोकी

सजाय निर्धारणका लागि असार २९ को पेसी

अदालतले दोषी ठहर गरेका टोपबहादुर रायमाझीसहितका १५ जनाको हकमा कति सजाय हुने भन्ने विषयमा निर्णय गर्न बाँकी राखेको छ। इजलासले सजाय निर्धारणका लागि आगामी असार २९ गतेको पेसी तोकेको छ।