अनुगमनका क्रममा पिज्जा बेसमा प्रयोग गरिने तेलमा मरेको साङ्ला भेटिएको थियो । साथै म्याद नाघेको फ्रुट सिरप (स्क्वास) प्रयोग गर्ने गरेको, फ्रिजमा खाद्य वस्तुहरूको भण्डारण अत्यन्त अव्यवस्थित रहेको र खाना पकाउने तेलको TPM (Total Polar Materials) २२.० पाइएको र सरसफाइ सामान्य मात्र रहेको पाईएको विभागका वरिष्ठ खाद्य अनुसन्धान अधिकृत डा. बाल कुमारी शर्माले जानकारी दिनुभयो ।
अनुगमनका क्रममा गम्भीर लापरबाही भेटिएपछि वाणिज्य आपूर्ति तथा उपभोक्ता संरक्षण विभागको टोलीले उपभोक्ता संरक्षण ऐन, २०७५ बमोजिम उक्त रेस्टुरेन्टलाई तत्कालै रु. २ लाख १ हजार (दुई लाख एक हजार रुपैयाँ) जरिवाना गरेको हो ।यस्तै, टोलीले रेस्टुरेन्टमा भेटिएको म्याद नाघेको तथा पूर्ण लेभल विवरण नभएको २ बोतल स्क्वास (फ्रुट सिरप) तत्कालै नष्ट गरेको छ ।विभागका वरिष्ठ खाद्य अनुसन्धान अधिकृत डा. बाल कुमारी शर्माका अनुसार रेस्टुरेन्टलाई अनुगमनका क्रममा देखिएका सम्पूर्ण कैफियत र कमजोरीहरू सुधार गरी ३ (तीन) दिनभित्र विभागमा प्रमाणसहित उपस्थित हुन कडा निर्देशन समेत दिइएको छ ।
