काठमाडौँ, ९ असारः काठमाडौँ महानगरपालिकाले सामुदायिक विद्यालयको शिक्षा सुधार र विद्यार्थी मूल्याङ्कन र नतिजा अभिलेखनका लागि शिक्षकलाई प्रशिक्षण दिन थालेको छ ।
यसै सन्दर्भमा कामपाले कक्षा ४ र ५ का शिक्षकलाई विद्यार्थी मूल्याङ्कन र नतिजा अभिलेखनसम्बन्धी सरकारले जारी गरेको शासकीय सुधारको बुँदा नं ८९ कार्यान्वयनका लागि प्रशिक्षण सुरु गरेको कामपाको भनाइ छ ।
शिक्षा विभागका प्रमुख नमराज ढकालले भन्नुभयो, “पहिलो चरणमा १८० जनालाई शिक्षकलाई प्रशिक्षित गरेको छ । आउँदो आइतबार थप १८० जनालाई तालिम प्रदान गर्ने कामपा शिक्षा विभागको योजना छ ।”
सरकारले जारी गरेको शासकीय सुधारसम्बन्धी कार्ययोजनाअन्तर्गतको ८९औँ बुँदामा उल्लेख भएको कक्षा ४ र ५ का विद्यार्थीको नियमित मूल्याङ्कनसम्बन्धी व्यवस्था कार्यान्वयन गर्न तालिम सञ्चालन गरिएको हो । पहिलो चरणको तालिम समापन गर्दै शिक्षा विभागका प्रमुख नमराज ढकालले भन्नुभयो, “तालिमले शिक्षकहरूलाई मूल्याङ्कन प्रणालीका विषय स्पष्टता कायम गरेको छ । आत्मविश्वास जगाएको छ ।”
शिक्षकहरूको उत्कृष्ट तथा नवीन अभ्यासहरूको आदानप्रदान, पाठ्यक्रमको परिचय र संरचना, विषयगत पाठ्यक्रम र तिनका विशेषता, नवीनतम् शिक्षण विधिको प्रयोग, विद्यार्थी मूल्याङ्कनका सम्भाव्य तरिका र साधनहरूको प्रयोग, सिकाइ उपलब्धि मूल्याङ्कन अभिलेख फारमको प्रयोग, जीपीए गणना र विद्यार्थीको प्रगति प्रतिवेदनको नमूना तयारीलगायत विषय तालिममा समावेश गरिएको थियो । तालिम सहजकर्ता सीता पाण्डेका अनुसार स्रोत शिक्षकहरूलाई स्रोतव्यक्तिका रूपमा राखेर तालिम सञ्चालन गरिएको हो ।
कामपाले चालु आर्थिक वर्षको यस अवधिमा एक हजार ६४६ जना शिक्षकहरूलाई विभिन्न विधामा तालिम प्रदान गरेको छ । यसमा बाल विकास सहजकर्ता (इसिडी) मा १२४ जना, मनोवैज्ञानिक र मनोसामाजिक परामर्शसम्बन्धी तालिममा १३४ जना, नेपाल भाषा प्रशिक्षणमा सामुदायिक विद्यालयतर्फ १६४, संस्थागततर्फ ११६ र विद्यार्थी मूल्याङ्कन तथा नतिजा अभिलेखनमा १८० जनालाई तालिम प्रदान गरिएको हो ।
सूचना तथा प्रविधिसम्बन्धी तालिममा ३८५ जना, एकीकृत पाठ्यक्रम कार्यान्वयन तथा मूल्याङ्कन र विषयगत रूपमा प्रश्नपत्र निर्माण तथा विद्यार्थी मूल्याङ्कनसम्बन्धी तालिममा ४६० र प्रारम्भिक बाल शिक्षादेखि कक्षा ३ सम्म अध्ययनरत विद्यार्थीको अपाङ्गता पहिचानसम्बन्धी तालिममा ८३ जना शिक्षक सहभागी हुनुभयो । असार महिनामा विद्यार्थी मूल्याङ्कन तथा नतिजा अभिलेखनसम्बन्धी थप १८० जना शिक्षकलाई तालिम दिने योजना कामपाको रहेको छ ।
