काठमाडौँ — नेकपाका सांसद रमेश मल्लले संसद्मा प्रतिपक्षले देखाएको रचनात्मक भूमिकालाई सरकारले कमजोरी ठान्न नहुने चेतावनी दिएका छन्। बिहीबार बसेको प्रतिनिधिसभा बैठकमा बोल्दै उनले विभिन्न समसामयिक विषयमा सरकार र प्रधानमन्त्रीको ध्यानाकर्षण गराएका हुन्।
सीमासम्बन्धी अभिव्यक्ति फिर्ता लिन माग
सांसद मल्लले प्रधानमन्त्रीले संसद्मा सीमाका विषयमा दिएको अभिव्यक्ति आपत्तिजनक रहेको भन्दै त्यसलाई तुरुन्त फिर्ता लिनुपर्ने माग गरे। सीमा जस्तो संवेदनशील विषयमा प्रतिपक्षले उठाएको आवाजलाई नजरअन्दाज नगर्न उनले सरकारलाई सचेत गराए।
प्रधानमन्त्री कार्यालयको क्षेत्राधिकारमाथि प्रश्न
सम्बोधनका क्रममा उनले प्रधानमन्त्री कार्यालयको कार्यशैलीमाथि पनि गम्भीर प्रश्न उठाए। प्रधानमन्त्री कार्यालयमा मानिसहरूलाई बोलाएर बयान लिने तथा पक्राउ गर्ने काम भइरहेको दाबी गर्दै उनले भने:
“प्रधानमन्त्रीको कार्यालय यस्ता (बयान लिने र पक्राउ गर्ने) काम गर्ने ठाउँ होइन। यस्ता गैरसंवैधानिक घटनाहरूले लोकतन्त्र र संविधानकै चीरहरण हुन सक्छ।”
संवैधानिक आयोगको सुरक्षा र छानबिनको माग
संवैधानिक निकायका पदाधिकारीहरूमाथि हस्तक्षेप भएको आशंका व्यक्त गर्दै सांसद मल्लले सभामुखमार्फत सरकारको ध्यानाकर्षण गराए। “संवैधानिक आयोगका पदाधिकारीलाई बोलाएर जबरजस्ती थुनछेक गरिएको छ भने यसको तत्काल छानबिन गरियोस् र दोषीमाथि कडा कारबाही होस्,” उनले माग गरे।
