काठमाडौँ, ३ असार ।
नेपाली कांग्रेसले प्रतिनिधि सभाका सभामुख डोलप्रसाद अर्यालको भूमिकामाथि गम्भीर प्रश्न उठाउँदै उनी पूर्वसम्बद्ध दल राष्ट्रिय स्वतन्त्र पार्टी (रास्वपा) को छाँयाबाट मुक्त हुन नसकेको आरोप लगाएको छ ।
बुधबार प्रतिनिधि सभाको बैठकमा बोल्दै कांग्रेस सांसद चन्द्रमोहन यादवले सभामुखले तटस्थ भूमिका निर्वाह गर्न नसकेको टिप्पणी गरे । “सभामुख महोदय, यो गरिमामय कुर्सीमा बस्नुअघि यहाँ एउटा पार्टीसँग सम्बन्धित हुनुहुन्थ्यो,” सांसद यादवले संसद्मा भने, “के सभामुख महोदयले अहिलेसम्म त्यो पहिलेको रास्वपा पार्टीसँगको नाभी काट्न सक्नुभएको छैन कि क्या हो ?”
प्रधानमन्त्री बालेनको अभिव्यक्तिमा रुलिङको माग
सांसद यादवले सीमा विवादबारे प्रधानमन्त्री बालेन (बालेन्द्र साह) ले दिएको विवादित अभिव्यक्तिमाथि सभामुखले रुलिङ नगरेको भन्दै आक्रोश पोखे । गत जेठ १७ गते संसद्मा सांसदहरूको प्रश्नको जवाफ दिँदै प्रधानमन्त्री बालेनले ‘भारतले नेपालको जग्गा मात्र नभई नेपालले पनि भारतको जग्गा धेरै ठाउँमा मिचेको’ अभिव्यक्ति दिएका थिए । विपक्षी दलहरूले सो राष्ट्रघाती अभिव्यक्तिको विरोध गर्दै सभामुखको रुलिङ माग गरे पनि सभामुख मौन बसेको कांग्रेसको आरोप छ ।
रास्वपाको नियमापत्ति: रेकर्डबाट हटाउन माग
सभामुखको भूमिकामाथि नै संसद्मा प्रश्न उठेपछि रास्वपा सांसद गणेश कार्कीले तत्काल नियमापत्ति गरे । प्रतिनिधि सभा नियमावलीको नियम २१ (ख) स्मरण गराउँदै कार्कीले सभामुखको आचरणमाथि औपचारिकता (प्रस्ताव) बिना आलोचना गर्न नपाइने व्यवस्था रहेको जिकिर गरे । उनले कांग्रेस सांसद यादवको उक्त अभिव्यक्ति संसद्को रेकर्ड (रेकर्ड) बाट हटाउन माग गरेका छन् ।
