काठमाडौं । नेपाल कम्युनिष्ट पार्टी (नेकपा) ले दार्चुलामा भारतीय सेनाको हेलिकोप्टर अवतरण भएको घटनालाई लिएर सरकारको आधिकारिक धारणा माग गरेको छ।
सोमबार बसेको प्रतिनिधिसभा बैठकमा बोल्दै नेकपाका सांसद युवराज दुलालले उक्त गम्भीर विषयमा सरकारको ध्यानाकर्षण गराउनुभएको हो। भारतीय सुरक्षा निकायका उच्च अधिकारी सवार हेलिकोप्टर नेपाली भूमिमा अवतरण भएको समाचार सार्वजनिक भएको उल्लेख गर्दै उहाँले सरकारले यसबारे संसद्लाई स्पष्ट जानकारी दिनुपर्ने माग गर्नुभयो।
“भारतीय सेनाको हेलिकोप्टर दार्चुलाको भूमिमा अवतरण गरेको र त्यसमा भारतीय सुरक्षा निकायका प्रमुख व्यक्ति सवार रहेको भन्ने समाचार आएको छ,” संसद्मा बोल्दै सांसद दुलालले भन्नुभयो, “यस संवेदनशील विषयमा सरकारको स्पष्ट जवाफ चाहिन्छ।”
यसका साथै, सांसद दुलालले सीमा सम्बन्धमा प्रधानमन्त्रीले दिएको हालैको अभिव्यक्ति राष्ट्रहितविपरीत रहेको आरोप समेत लगाउनुभयो। उक्त अभिव्यक्तिबारे प्रधानमन्त्रीले संसद्मै आएर स्पष्टीकरण दिनुपर्ने आफ्नो पार्टीको अडान यथावत् रहेको उहाँले स्पष्ट पार्नुभयो।
