पश्चिम नवलपरासी, २८ जेठ: समुदायलाई विपद् प्रकोपबाट सुरक्षित बनाउन, आपतकालिन प्रतिकार्य प्रणालीलाई सुदृढ गर्न र संकटका बेला समयमै प्रभावकारी सहयोग उपलब्ध गराउने उद्देश्यका साथ पश्चिम नवलपरासीमा १८ दिने समुदाय विपद् स्वयंसेवक तालिम सुरु भएको छ ।
सशस्त्र प्रहरी बल नेपाल नं. २६ गण हे.क्वा. पश्चिम नवलपरासीको आयोजना तथा रामग्राम नगरपालिका, पाल्हिनन्दन गाउँपालिका र सरावल गाउँपालिकाको समन्वय एवं सहकार्यमा उक्त तालिम सञ्चालन गरिएको हो । गण परिसर भित्रै आयोजित यस विशेष तालिममा तीनवटै स्थानीय तहका गरी कुल २५ जना स्थानीय व्यक्तिहरूको सहभागिता रहेको छ,जसलाई विनाशकारी विपत्तिमा प्रतिकार्यका लागि क्षमतायुक्त र दक्ष बनाउन आधारभूत ज्ञान तथा सिप प्रदान गरिनेछ ।
तालिमको सशस्त्र प्रहरी बल, नेपाल नं. २६ गण हे.क्वा. पश्चिम नवलपरासीका गणपति सशस्त्र प्रहरी उपरीक्षक गोविन्द बहादुर खातीको प्रमुख आतिथ्यतामा विधिवत् रुपमा समुद्घाटन गरिएको हो भने कार्यक्रममा रामग्राम, पाल्हिनन्दन र सरावलका विपद् व्यवस्थापन शाखा प्रमुखहरुको समेत उपस्थिति रहेको थियो । यही जेठ २८ गतेदेखि सुरु भएको यो तालिम आगामी असार १७ गते समापन हुनेछ ।
