बाजुरा, २१ जेठ । बाजुराको बूढीनन्दा नगरपालिकामा मदिरा सेवनपछि दुई जनाबीच भएको विवादले उग्र रूप लिँदा एक जनाको ज्यान गएको छ। बूढीनन्दा नगरपालिका–६ कोटिलाका टेकेन्द्र रावतको ढुङ्गा प्रहारबाट स्थानीय नीर रावतको घटनास्थलमै मृत्यु भएको हो।
जिल्ला प्रहरी कार्यालय बाजुराका अनुसार आज बिहान स्थानीय एक होटलमा दुवै जनाले सँगै मदिरा सेवन गरेका थिए। मदिराले मातेका उनीहरूबीच सामान्य विषयमा विवाद सुरु भएको र सोही क्रममा टेकेन्द्रले नीरमाथि ढुङ्गा प्रहार गरेका थिए। ढुङ्गाले टाउकोमा लागेर नीरको घटनास्थलमै मृत्यु भएको प्रहरी निरीक्षक गगनसिंह भाटले जानकारी दिए।
घटनालगत्तै स्थानीयले प्रहरीलाई खबर गरेका थिए। घटनाबारे जानकारी प्राप्त हुनासाथ जिल्ला प्रहरी कार्यालय र स्थानीय चौकीबाट प्रहरीको टोली घटनास्थलतर्फ प्रस्थान गरेको छ। घटनामा संलग्न टेकेन्द्र रावतलाई नियन्त्रणमा लिने र थप अनुसन्धान गर्ने कार्य भइरहेको प्रहरीले जनाएको छ।
