काभ्रे – अविरल वर्षापछि रोशी खोलाको पानीको सतह बढेपछि सडक कटान हुँदा त्यहाँ फसेका पाँचवटा गाडी र झण्डै ६० जना यात्रुलाई सुरक्षित उद्धार गरिएको छ।
उद्धारको घटना काभ्रेको नमोबुद्ध नगरपालिका–६ चौकीडाँडा र रोशी गाउँपालिका–७ चारसय बेसीजिल्लो रहेको रोशी खोला क्षेत्रमा भएको हो।
सशस्त्र प्रहरी बलका एक अधिकारीका अनुसार बाटो पूर्ण रूपमा बगाएपछि पाँचवटा हायस र ती सवारीमा सवार यात्रुहरू त्यहीँ अलपत्र परेका थिए। उनीहरूलाई सशस्त्र प्रहरीले डोरी, डोजर र एक्स्काभेटरको प्रयोग गरी सुरक्षित निकालेको हो।
खोलामा गाडी तथा यात्रु फसेको खबर पाउनासाथ नम्बर १५ गण काभ्रे र मनसुन प्रतिकार्य बेस भकुण्डेबाट प्रहरी टोली तुरुन्त घटनास्थल पुगेको थियो।
त्यसैगरी, सम्भावित थप जोखिमलाई ध्यानमा राख्दै बीपी राजमार्ग खण्डअन्तर्गत रोशी गाउँपालिका–७ लासटोलबाट काठमाडौंतर्फ आउँदै गरेको १५० भन्दा बढी सवारी साधनलाई रोकी राखिएको प्रहरीले जनाएको छ।
