वाशिङ्गटन (सीएनएन) — अमेरीकी गुप्तचर रिपोर्टिङसँग परिचित धेरै स्रोतका अनुसार, खार्क द्वीपलाई नियन्त्रणमा लिने सम्भावित अमेरीकी सैन्य अप्रेसनको तयारीलाई मध्यनजर गर्दै इरानले पछिल्ला हप्ताहरूमा त्यहाँ अतिरिक्त सैन्य कर्मचारी, हवाई रक्षा प्रणाली र ‘पासो’हरू बिछ्याइरहेको छ।
ट्रम्प प्रशासनले उत्तर-पूर्वी फारसको खाडीमा रहेको यो सानो टापु कब्जा गर्न अमेरीकी सेना प्रयोग गर्ने विषयमा विचार गरिरहेको छ। इरानको झण्डै ९०% कच्चा तेल निर्यात हुने यो टापु इरानको आर्थिक मेरुदण्ड हो। हर्मुज जलडमरू पुनः खोल्न इरानलाई बाध्य पार्ने रणनीतिक दबाब का रूपमा यसलाई प्रयोग गर्ने योजना रहेको छ।
तर अमेरीकी अधिकारी र सैन्य विज्ञहरू भन्छन् कि यस्तो जमीनी अप्रेसनमा ठूलो जोखिम छ, जसमा धेरै संख्यामा अमेरीकी सैनिकहरू हताहत हुन सक्छन्। स्रोतका अनुसार, यो टापुमा सुरक्षाका धेरै तहहरू छन् र इरानीहरूले हालैका हप्ताहरूमा त्यहाँ काँधमा राखेर प्रहार गरिने सतहबाट हावामा मार हान्ने मिसाइल प्रणाली थपेका छन्।
इरानले टापुको वरिपरि एन्टी-पर्सनल (मान्छे मार्ने) र एन्टी-आर्मर (ट्याङ्क प्रतिरोधी) माइनहरू सहितका पासोहरू बिछ्याइरहेको छ। यदि राष्ट्रपति डोनाल्ड ट्रम्पले जमीनी अप्रेसन अघि बढाएमा अमेरीकी सेना अवतरण गर्न सक्ने समुद्री किनारमा समेत यस्ता माइनहरू राखिएका छन्।
राष्ट्रपतिका केही सहयोगीहरूले यस्तो अप्रेसनको आवश्यकतामाथि गम्भीर प्रश्न उठाइरहेका छन्। उनीहरूका अनुसार यो टापु कब्जा गर्दैमा मात्रै हर्मुज जलडमरू र विश्व ऊर्जा बजारमा इरानको पकडसँग सम्बन्धित समस्याहरू समाधान हुने छैनन्।
अमेरीकी सेन्ट्रल कमाण्ड ले मार्च १३ मा खार्कका ९० वटा लक्ष्यहरूमा आक्रमण गरिसकेको छ, जसमा मिसाइल भण्डारण बङ्कर र नौसैनिक माइन सुविधाहरू थिए। ट्रम्पले “शिष्टताका कारण” टापुको तेल पूर्वाधारमा आक्रमण नगरिएको बताएका थिए।
सेवानिवृत्त एडमिरल जेम्स स्टाभ्रिडिसले चेतावनी दिँदै भनेका छन्, “इरानीहरू चतुर र निर्दयी छन्। उनीहरू आफ्नो सार्वभौम क्षेत्रमा आउने अमेरीकी सेनालाई अधिकतम क्षति पुर्याउन जे पनि गर्न सक्छन्।”
इरानी संसदका सभामुख मोहम्मद बागेर गालिबाफले ‘एक्स’ मार्फत चेतावनी दिँदै भनेका छन्, “यदि शत्रुले सीमा नाघ्यो भने, उनीहरूलाई सहयोग गर्ने क्षेत्रीय देशका सबै महत्वपूर्ण पूर्वाधारहरू हाम्रो निशानामा हुनेछन्।”
खार्क टापु न्युयोर्कको तुलनामा एक तिहाइ आकारको छ। यसलाई कब्जा गर्न ठूलो सैन्य बल आवश्यक पर्नेछ। हालै दुईवटा ‘मरीन एक्सपिडिसनरी युनिट’मध्यपूर्वमा तैनाथ गरिएका छन्, जसमा हजारौँ मरीन सैनिक र युद्धपोतहरू छन्। साथै, ८२औँ एयरबोर्न डिभिजनका करिब १,००० सैनिकहरू पनि क्षेत्रमा जाँदैछन्।
खाडीका सहयोगी राष्ट्रहरूले ट्रम्प प्रशासनलाई जमीनी युद्ध नलम्ब्याउन निजी रूपमा आग्रह गरिरहेका छन्। उनीहरूको डर छ कि खार्क कब्जा गर्ने प्रयासले ठूलो संख्यामा सैनिकको मृत्यु हुनेछ र इरानले खाडी देशका पूर्वाधारहरूमाथि प्रतिशोध लिनेछ।
इरानले अमेरिका र इजरायललाई लक्षित गर्दै एक गम्भीर सैन्य चेतावनी जारी गरेको छ। यदि अमेरिकाले इरानको खार्क द्वीप कब्जा गर्ने वा फारसको खाडीमा कुनै ‘जमीनी अप्रेसन’ गर्ने मूर्खता गरेमा, इरानले लाल सागर र बाव अल-मन्डेब जलडमरूमा नयाँ युद्ध मोर्चा खोल्ने धम्की दिएको छ।
नयाँ मोर्चाको धम्की: इरानी सैन्य स्रोतका अनुसार, अमेरिकाले हर्मुज जलडमरूको विकल्प खोज्न खोजेमा इरानले विश्वकै अर्को महत्वपूर्ण व्यापारिक मार्ग ‘बाव अल-मन्डेब’ मा यस्तो संकट पैदा गरिदिनेछ, जसले अमेरिकालाई दोब्बर क्षति पुर्याउनेछ।
क्षेत्रीय पूर्वाधारमा आक्रमण: इरानले स्पष्ट पारेको छ कि उसले इजरायल वा अमेरिकाको आक्रमणको बदला केवल उनीहरूसँग मात्र होइन, उनीहरूलाई सहयोग गर्ने क्षेत्रीय देशका ग्यास र तेल पूर्वाधारहरूमा आक्रमण गरेर लिनेछ। यसअघि कतारको रास लाफान एलएनजी केन्द्रमा भएको आक्रमणलाई इरानले उदाहरणका रूपमा प्रस्तुत गरेको छ।
आश्चर्यजनक हमलाको तयारी: इरानले आफ्नो भूमि र टापुहरूमा ‘एन्टी-पर्सनल’ र ‘एन्टी-आर्मर’ माइनहरू बिछ्याएर अमेरीकी मरीन सैनिकहरूका लागि घातक पासो तयार पारेको दाबी गरेको छ।
