असोज २१ काठमाण्डौँ । बलियो सुरक्षा संयन्त्र भएको ईजरायलमा हमास लडाकु समुहले अचानक शनिबार बिहानदेखि गरेको आक्रमण र ईजरायलले शुरु गरेको जवाफी कार्बाहीमा ५ सय जना भन्दा बढीको मृत्यु भएको छ ।
मृत्यु हुनेमा ३ सय भन्दा बढी ईजरायलका सेना र नागरिक रहेका छन् । ईजरायली सेनाले गाजामा गरेको हवाई आक्रमणमा २३० भन्दा बढी प्यालेष्टाईनी नागरिकको मृत्यु भएको छ ।
अहिले पनि २२ स्थानमा दोहोरो भीडन्त जारी रहेको सञ्चार माध्यमहरुले जनाएका छन् ।
दुबै तर्फगरी २५ सय भन्दा बढी मानिस घाईते भएका छन् । घाईते हुनेमा ९ जना नेपाली समेत परेका छन् ।
हमासले अल अक्स फ्लड अप्रेशन भनेर ईजरायली सीमामा प्रवेश गरेर चौतर्फी आक्रमण गरेको थियो । यो सरप्राईज हमलामा उनीहरुले ईजरायली सीमामा बुलडोजर चलाउनुका साथै सैन्य ब्यारेक कब्जा गरेका थिए ।
उनीहरुले ३५ जना भन्दा बढी ईजरायली सेना र नागरिकलाई युद्धबन्दी बनाएका छन् । उनीहरु मध्य केहीको हत्या भएको ईजरायली सेनाले आशंका गरेको छ ।
