काठमाण्डौँ । प्रधानमन्त्री प्रचण्डले मेलम्ची खानेपानी आयोजना राष्ट्रिय गौरवको आयोजना भएकाले त्यसलाई अझै व्यवस्थित बनाउन सरकार लागि पर्ने प्रतिवद्धता जनाएका छन् ।
७८ सालमा बाढीले क्षति पुर्याएको मुहान स्थल र सडकको निरीक्षण गर्दै प्रधानमन्त्रीले त्याहाँ बाह्रै मास चल्ने सडक निर्माणका लागि थप आर्थिक स्रोतको व्यवस्था गर्ने बचन पनि दिए ।
साथै अब याङग्री र लार्के खोलाको पानी समेत मेलम्चि सुरुङ मार्गमा जोडेर ल्याउने काम तीव्र पार्ने आस्वासन दिए ।
काठमाण्डौँमा यसको गृहकार्य गरेर थप कार्य अघि बढाउने उनको भनाई छ । मेलम्चीबाट हाल १७ करोड लिटर पानी दैनिक काठमाण्डौँमा आईरहेको छ । याङग्री र लार्के खोलाको पानी पनि मिसाउदा काठमाण्डौँमा दैनिक ५१ करोड लिटर पानी आपुर्ति हुनेछ ।
यस भ्रमणमा खानेपानी मन्त्री महेन्द्र राय यादव र श्वास्थ्यमन्त्री मोहन बहादुर बस्नेत लगायतको पनि सहभागीता रहेको थियो ।
विसं २०७८ असार १ गते मेलम्ची खोलामा बाढी र पहिरो आउँदा खानेपानी आयोजनाको मुहानमा क्षति पुगेको थियो । बर्खा सकिएपछि मुहान क्षेत्र मर्मत गरेर आयोजना पुनःसञ्चालन गरिएको थियो ।
विसं २०७७ चैतमा पहिलोपटक मेलम्चीको पानी अस्थायीरुपमा काठमाडौं उपत्यकामा वितरण थालिएको थियो । विसं २०७८ असारमा मेलम्ची खोलामा आएको बाढी र पहिरोले मुख्य सुरुङबाहेकमा क्षति गरेपछि पानी वितरण रोकिएको थियो । मुहानमा मर्मत गरेर २०७८ चैतदेखि पुनःमेलम्चीको पानी वितरण थालिएको थियो ।
