चैत्र २७ काठमाण्डौँ । फ्रान्सका राष्ट्रपति ईम्यानुएल म्याक्रोनले अब यूरोपले अमेरीकाको पिछलग्गु हुनबाट जोगिनु पर्ने बताएका छन् । हालै चीन भ्रमणमा रहेका बेला बिमानमै अन्तवार्ता दिँदै उनले यो अभिव्यक्ति दिएपछि यसबारे नेटोमा खलबलि पैदा भएको छ ।
अब यूरोपले एउटा रणनीतिक स्वायत्तताको सिद्धान्त अनुसार अमेरीकामाथिको निर्भरता घटाउनु पर्ने उनको धारणा छ ।
चीनले ताईवान लक्षित सैन्य अभ्यास गरीरहेको समयमा म्याक्रोनले चीन ताईवान मुद्धामा चीन र अमेरीकाको बीचमा यूरोप उभिन नहुने पनि सुझाए ।
गत बुधवार ताइवानी राष्ट्रपति साई–इंग वेन र अमेरिकी हाउस ऑफ रिप्रजेंटेटिभ केविन मैकेर्थीसँग भेटवार्ता गरेपछि चीनले बिशाल सैन्य अभ्यास शुरु गरेको छ ।
यूरोप अब तेस्रो सुपर पावर बन्ने नीतिमा लाग्नु पर्ने उनको भनाई छ । चीनीया राष्ट्रपति सि जिन पिङसँगको बिशेष भेटपछि विमान मार्फत गुआङ चाओ जाने क्रममा उनले फ्रान्सका दुई र एक युरोपेली पत्रकारसँग साक्षात्कार गरेका थिए ।
उनले जुन समस्या यूरोपको हैन, त्यसमा फसेर यूरोपले जोखिम उठाउन नहुने तर्कमा जोड दिएका छन् । यूरोपेली जनताले अमेरीकाको अनुयायी भएको भन्ने सवालको जवाफ खोज्नु पर्ने समय आएको म्याक्रोनको तर्क छ ।
उनले यूरोपले युक्रेन संकट समेत समाधान गर्न नसकेका बेला ताईवान मुद्धामा अमेरीकाको पछि लाग्नु उचित नहुने बताए ।
