फागुण १७ काठमाण्डौँ । अष्ट्रेलियन प्रहरीले एक भारतीय नागरिकलाई गोली हानेर मारिदिएको छ । ३२ वर्षीय भारतीय नागरिक मोहम्मद रहमथुल्लाह सैयद अहमदलाई अष्ट्रेलियाको प्रहरीले गोली हानेको हो ।
सिड्नीको अबर्न रेलवे स्टेशनमा एक क्लिनरमाथि छुरा प्रहार गर्नुका साथै प्रहरीमाथि पनि आक्रमणको प्रयास गरेकाले उनलाई गोली हानिएको अष्ट्रेलियन प्रहरीले जनाएको छ ।
अस्ट्रेलिया स्थित भारतीय महावाणिज्य दूतावासका अनुसार ब्रिजिङ भिसामा अबर्नमा बस्दै आएका आक्रमणकारी भारत तमिलनाडुका हुन्।
अष्ट्रेलियास्थित भारतीय महावाणिज्य दूतावासले घटना अत्यन्तै डरलाग्दो र दुर्भाग्यपूर्ण भएको प्रतिक्रिया दिएको छ। विदेश मामिला तथा व्यापार विभाग,न्यू साउथवेल्स कार्यालय र राज्य प्रहरी अधिकारीहरूसँग यस विषयमा कुरा उठाएको दूतावासले जनाएको छ।
सिड्नीको पश्चिममा रहेको अबर्न रेलवे स्टेशनमा कार्यरत एक २८ वर्षीय क्लिनरमाथि आक्रमण गरेका थिए । घटनाको करिब पाँच मिनेटपछि अबर्न प्रहरी चौकी पुगेका उनले त्यहाँका प्रहरी अधिकारीमाथि पनि आक्रमणको प्रयास गरेका थिए ।
