पुष २९ काठमाण्डौँ । उच्च अदालतले धरौटीमा रिहा गर्न आदेश दिएका क्रिकेटर सन्दीप लामिछानेका दाजुले जिल्ला अदालतमा धरौटी रकम जम्मा गरेका छन्।
सन्दीपका दाजु मोहन लामिछाने शुक्रबार आज २० लाख रुपैयाँ लिएर जिल्ला अदालत काठमाडौं पुगेका हुन्।
धरौटी जम्मा गरेसँगै सन्दीप आजै छुट्ने भएका छन्। अब अदालतले केन्द्रीय कारागार सुनधरामा सन्दीपलाई रिहा गर्न पत्र पठाएपछि उनी त्याहाँबाट थुनामुक्त हुनेछन् ।
त्यसपछि सन्दीपलाई तारिख बुझ्नका लागि जिल्ला अदालत काठमाडौंमा उपस्थित गराइनेछ।
जबर्जस्ती करणीको मुद्दामा जिल्ला अदालत काठमाडौंले सन्दीपलाई कात्तिक १८ मा पुर्पक्षका लागि थुनामा पठाउने आदेश दिएको थियो।
उच्च अदालतका न्यायाधीश ध्रुवराज भट्टराई र रमेश ढकालको इजलासले जिल्ला अदालतको आदेश बदर गर्दै २० लाख रुपैयाँ धरौटीमा रिहा गर्न बिहीबार आदेश दिएको थियो।
यसपछि पनि लामिछाने विदेश जान पाउने छैनन् भने पीडित किशोरीसँग सम्पर्क गर्न पाउने छैनन् ।
