एजेन्सी मंसीर २१ । कतारमा जारी विश्वकपमा नकआउट चरणका सम्पूर्ण खेलहरु पूरा भएका छन् ।
नकआउटको अन्तिम खेलमा पोर्चुगलले स्वीजरल्याण्ड बिरुद्ध गोलको बर्षा गरेको छ ।
पहिलो हाफ्मा दुई शुन्यको अग्रता बनाएको पोर्चुगलले दोस्रो हाफ्मा थप चार गोल गर्यो ।
स्वीजरल्याण्डले एक मात्र सान्त्वना गोल फर्कायो ।
कतार विश्वकपमै पहिलो पटक गोन्सालो रामोसले ह्याट्रीक गरेका छन् ।
त्यस्तै पेपे, राफेल गुरेइरो र राफेल लाओले एक–एक गोल गरे ।
रामोसले खेलको १७औं मिनेटमा गोल गर्दै पोर्चुगललाई अग्रता दिलाएका थिए । खेलको ३३ औं मिनेटमा पेपेले गोल गर्दै पोर्चुगलको अग्रता दोब्बर बनाए ।
खेलको ५१औं मिनेटमा रामोसले व्यक्तिग दोस्रो गोल गर्दै पोर्चुगललाई ३–० गोलको अग्रता दिलाए । खेलको ५५औं मिनेटमा गुरेइरोले गोल गर्दै पोर्चुगलको अग्रता ४–० बनाए । स्वीजरल्यान्डका लागि मानुयल अकाङ्जीले गोल गर्दै टिमलाई ४–१ गोलको अवस्थामा ल्याए ।
खेलको ६७औं मिनेटमा रामोसले ह्याट्रिक पूरा गर्दै टिमलाई ५–१ गोलको अग्रता दिलाए । खेलको इन्जुरी समयमा लाओले गोल गर्दै पोर्चुगललाई ६–१ गोल अन्तरको जित दिलाए । पोर्चुगलले अब क्वाटरफाइनलमा मोरक्कोको सामना गर्नेछ ।
