भदौ १३ काठमाण्डौँ । नेपाल केन्याविरुद्धको चौंथो टी ट्वान्टी अन्तर्राष्ट्रियमा पराजित भएको छ । आज भएको खेलमा नेपालको ब्याटीगं कमजोर रहँदा सात रनले पराजीत हुन बाध्य भयो ।
नैरोवीस्थित जिमखाना क्रिकेट मैदानमा केन्याले दिएको १०२ रनको लक्ष्य पछ्याएको नेपालले २० ओभरमा ९ विकेट गुमाएर ९४ रन मात्र बनाउन सक्यो । नेपालका लागि रोहित पौडेलले सर्वाधिक ४७ रन बनाए । त्यस्तै आदील अन्सारीले ८ रन जोड्दा दीपेन्द्र सिंह ऐरी, ज्ञानेन्द्र मल्ल र अर्जुन साउद समान ६ रनमा आउट भए । केन्याका रकिप पटेलले तीन विकेट लिए । भिराज पटेल, शेम एन्गोचे र एलिज्ह ओटिनोले दुईरदुई विकेट लिए ।
यसअघि टस जितेर पहिले ब्याटिङ गरेको केन्याले २० ओभरमा अलआउट हुँदै १०१ रन बनाएको थियो । केन्याका लागि लुकास ओलुओचले सर्वाधिक ३३ रन बनाए । यस्तै कोलिन्स अबुयाले २० रन बनाए । कप्तान शेम एन्गोचेले १३ रनको योगदान गरे । नेपालका कप्तान सन्दीप लामिछानेले पाँच विकेट लिए । उनले ४ ओभरमा मात्र ९ रन खर्चिए । आदील अन्सारीले दुई तथा साहब आलम र दीपेन्द्र सिंह ऐरीले एकरएक विकेट लिए ।
यो जितसँगै केन्याले नेपालविरुद्धको सिरिज २-२ को बराबरी गरेको छ । नेपाल र केन्याबीचको पाँचौ तथा अन्तिम टी-ट्वान्टी मंगलबार हुनेछ । टी ट्वान्टी सिरिजपछि नेपालले घरेलु टोलीसँग एकदिवसीय सिरिज खेल्नेछ ।
