असार ३ काठमाण्डौँ । मलेसियामा आजदेखि सुरू एसिसी महिला टी २० च्याम्पियनसिपमा नेपालले भुटानमाथि ५० रनको फराकिलो जित निकालेको छ । नेपालसामु निरीह देखिएका भुटानी ब्याट्सम्यानहरु मध्य एक जना बाहेक अन्यले दोहोरो रन जोड्न सकेनन् ।
नेपालले दिएको ९५ रनको लक्ष्य पछ्याएको भुटान १७.५ ओभरमा ४४ रनमै अलआउट भयो।
भुटानका लागि छिरिङ जाङ्मोले सबैभन्दा बढी १६ रन जोडिन्। बलिङमा नेपालकी संगीता राईले ३ विकेट लिइन्। सीता मगर र कविता कुँवरले २–२ विकेट हात पारे। इन्दू बर्मा र अस्मिना कर्माचार्यले १–१ विकेट लिए।
त्यसअघि टस जितेर पहिले ब्याटिङ गरेको नेपालले ९ विकेटको क्षतिमा ९४ रन जोडेको थियो । नेपालका लागि काजल श्रेष्ठले २६ रन, कप्तान रूबिना क्षेत्रीले २१ रन र इन्दू बर्माले २० रन जोडेकी थिईन् । बलिङमा भुटानकी सोनाम पाल्दोनले ४ विकेट लिइन्।
नेपाल समूह बीमा रहेको छ। यो समूहमा भुटानसहित कुवेत, हङकङ र बहराइन छन्।
यस्तै समूह ए मा घरेलु टोली मलेसिया, ओमान, कतार, सिंगापुर र युएई छन्। दुई समूहका शीर्ष दुई टिम सेमिफाइनल पुग्नेछन् भने फाइनल पुग्ने दुई टिम महिला टी–२० एसिया कपमा छनोट हुनेछन्।
नेपालले दोस्रो खेलमा भोलि कुवेतसँग खेल्ने छ भने तेस्रो खेलमा सोमबार बहराइन र चौथो खेल मंगलबार हङकङसँग खेल्नेछ।
