३१ जेठ, काठमाडौं । एएफसी एसियन कपको तेस्रो चरणको छनोटको अन्तिम खेलमा नेपालले आज ईन्डोनेशियासँग खेल्दैछ । यस अघि जोर्डन र कुवेतसँग पराजीत भएर छनौटको संभावना लगभग समाप्त भएको नेपालका लागि आजको खेल प्रतिष्ठाको लागि मात्रै हुने निश्चित छ ।
नेपाल र इन्डोनेसियाबीचको खेल आज राति १ बजे कुवेतको कुवेत सिटीस्थित जाबेर अल अहमद इन्टरनेशनल स्टेडियममा हुनेछ ।
कुवेतलाई समेत हराएको ईन्डोनेशिया नेपाल भन्दा बलियो टिम देखिन्छ । तर पछिल्लो खेलहरुमा नेपालले पनि राम्रो प्रदर्शन गर्दै आएकाले जीतका लागि खेल्ने टोलीको लक्ष्य छ ।
तेस्रो चरणको छनोटबाट समूह विजेता बन्ने टोली सिधै अर्को वर्ष हुने एसिया कपमा छनोट हुनेछ । यस्तै उत्कृष्ट पाँच उपविजेता पनि एसिया कपमा छनोट हुनेछ ।
नेपालको लागि इन्डोनेसिया नयाँ प्रतिद्वन्दी जस्तै हो । नेपालले अहिलेसम्म इन्डोनेसियासँग एक खेल मात्र खेलेको थियो । नेपालले इन्डनेसियासँग सन् २०१४ मा मैत्रीपूर्ण खेल खेलेको थियो । मालाङ्गमा भएको उक्त खेलमा नेपाल २–० ले पराजित भएको थियो ।
