बैशाख २१ काठमाण्डौँ । जिम्बावे ‘ए’विरुद्धको टी–ट्वान्टी सिरिजको अन्तिम खेलमा नेपाल विजयी भएको छ । यो सँगै नेपालले सिरिज बराबरी गरेको छ ।
कीर्तिपुरस्थित त्रिवि क्रिकेट मैदानमा बुधबार भएको अन्तिम खेलमा नेपाल ८ विकेटले विजयी भएको हो । जिम्बावले दिएको १ सय ३७ रनको विजयीलक्ष्य १५.५ ओभरमा पूरा गर्दै नेपालले सिरिजमा पहिलो जित निकालेको हो ।
नेपालका लागि आशिफ शेखले अविजित ८७ रन बनाए । ५४ बलको सामना गरेका उनले १३ चौका र १ छक्का प्रहार गरेका थिए। कुशल भुर्तेल ३४ रनमा आउट हुँदा बसिर अहमदले १० रन बनाए ।
त्यसअघि टस हारेर पहिला ब्याटिङमा तानिएको जिम्बावेले निर्धारित २० ओभरमा ७ विकेट गुमाएर १ सय ३६ रन बनाएको थियो ।
उसका लागि रोय काइयाले ४९, टाडिवानाशे मरुमानीले २७ र इन्नोसेन्ट काइयाले १४ रन बनाएर आउट हुँदा लुक जोङ्वे २३ रनमा नटआउट रहे । त्यसबाहेकका खेलाडीले दोहोरो अंकमा रन जोड्न सकेनन् ।
नेपालका कप्तान सन्दीप लामिछानेले दुई तथा बसिर अहमद र सोमपाल कामीले एक–एक विकेट लिए ।
सिरिजको पहिलो खेलमा नेपाल जिम्बावेसँग ६ विकेटले पराजित भएको थियो भने दोस्रो खेल वर्षाका कारण अवरुद्ध भएको थियो ।
टी–ट्वान्टी सिरिज सकिएसँगै नेपालले सोही टीमसँग तीन खेलको एक दिवसीय सिरिज खेल्नेछ ।
