चैत्र १२ काठमाण्डौँ । नेपालले पाहुना टोली पपुवा न्युगिनीलाई २७९ रनको चूनौती दिएको छ । टस जीतेर पहिले ब्याटिगं गरेको नेपालले ५० ओभरमा ८ विकेट गुमाएर २७८ रन जोड्न सफल भयो ।
नेपालका लागि आज युवा ब्याट्सम्यान दिपेन्द्र सिंह ऐरीले शतक पुरा गरेका छन् । ऐरीले १४० बल खेल्दै ७ चौकाको मद्दतमा १०५ रन बनाएर आउट भए । हिजोको खेलमा रोहित पौडेलले शतक पूरा गरेका थिए ।
त्यसै गरी आज देव खनालले पनि उत्कृष्ट ब्याटीगं गरे । उनले ८६ बल खेल्दै तीन छक्का र चार चौकाको मद्धतमा ७२ रन जोडे । दीपेन्द्र र खनालले १२९ रनको साझेदारी गरेका थिए ।
शुरुमै ओपनर कुसल भुर्तेल शुन्य र अनिल शाह एक रनमा आउट भएपछि संकटमा परेको नेपाललाई ऐरी र खनालले उकासेका थिए ।
त्यसपछि रोहित पौडेलले पनि ३५ रन बटुले भने भीम सार्कीले २६ रन जोडे । सन्दीप लामीछानेले अविजीत ९ बलमा २४ रन जोडे ।
आरिफ शेख ४ रनमा आउट भए भने पवन सर्राफ शुन्य रनमै पेभिलियन फर्किए ।
पपुवा न्युगिनीका लागि एलेई नाओले सर्वाधिक ३ विकेट लिए । पहिलो खेलमा पराजीत भएको नेपालले आज जीत हात पार्दै सिरिज बराबरी गर्ने लक्ष्य लिएकाले अब बलरहरुले कसिलो बलिंग गरेमा उक्त चूनौतीको रक्षा गर्न सक्नेछ ।
हिजो २९२ रन जोडेको पपुवा न्युगिनीलाई रोक्न बलहरुले किफायती बलिगं गर्दै विकेट झार्नु जरुरी छ । कीर्तिपुर क्रिकेट मैदानमा केही बेरमा पपुवा न्युगिनीले जवाफी ब्याटीगं थाल्नेछ ।
