असोज ५ काठमाडौ । लगातार दोहोरो तेहोरो अंकले ओराले लागेको नेप्से परिसूचक आज भने केही सुधार आएको छ । आज नेप्से १३ अंकले बढेर बन्द भयो । मंगलबार सेयर बजारमा १५१ अंकको उतारचढाव देखिएको छ। सुरुवाती आधा घण्टामा ८३ अंकले घटेर २६१५ बिन्दुसम्म झरेको बजार त्यसपछि २५ मिनेटमा १५१ अंक सुधार भएपछि २७६६ बिन्दुसम्म पुगेको थियो।
बजार १ बजेपछि भने केही स्थिर हुँदै अन्तिममा १३ अंकले बढेर बन्द भएको छ।
म्युचुअल फण्डसहित २२३ कम्पनीको सेयर कारोबार हुँदा १२२ कम्पनीको सेयर मूल्य बढेको छ । ९ कम्पनीको स्थिर र बाँकी कम्पनीको सेयर मूल्य घटेको छ । मनकामना स्मार्ट लघुवित्तको सेयर मूल्य १० प्रतिशतले बढ्दा रुरु र निफ्राको सेयर मूल्य करिब ५.५ प्रतिशतले बढेको छ।
अधिकांश उपसमूह हरियो भएको बजारमा चार उपसमूह झिनो अंकले घटेका छन्। सबैभन्दा धेरै जीवन बीमा समूह १९९ अंकले बढेको छ। अन्य उपसमूह पनि झिनो अंकले नै बढेका छन्।
अरुण भ्याली हाइड्रोपावरको सर्वाधिक २५ करोड रुपैयाँको सेयर किनबेच हुँदा नबिल बैंक, निफ्रा र हिमालयन डिष्टिलरीको समान २० करोड रुपैयाँको सेयर किनबेच भएको छ।
