देउवा सरकारले ओली सरकारले नियुक्त गरेका दुई प्रदेश प्रमुख फेरबदल गरेको छ । ओली सरकारले प्रदेश प्रमुख बनाएका गण्डकीकी सीता पौडेल र लुम्बिनीका धर्मनाथप्रसाद यादवलाई हटाएर ओली सरकारले हटाएका अमिक शेरचन र पृथ्वी बहादुर गुरुङलाई नियुक्त गरेको छ ।
आज बालुवाटारमा बसेको मन्त्रिपरिषद् बैठकले गण्डकीमा पृथ्वीबहादुर गुरूङ र लुम्बिनीमा अमिक शेरचनलाई प्रदेश प्रमुख बनाउने निर्णय गरेको छ ।
मन्त्रीपरिषद्को सिफारीस अनुसार अब राष्ट्रपतिले नयाँ प्रदेश प्रमुख नियुक्त गर्नेछिन् ।
लुम्बिनीका प्रदेश प्रमुख बनेका शेरचन यसअघि गण्डकीका प्रदेश प्रमुख थिए। नेकपा विघटन भएपछि ओली सरकारले उनलाई हटाएर पौडेललाई गण्डकीकी प्रदेश प्रमुख बनाएको थियो।
नयाँ प्रदेश प्रमुख बनाउँदा सत्तारूढ नेपाली कांग्रेस र माओवादी केन्द्रले एक–एक भागबन्डा गरेका हुन्। शेरचन माओवादी केन्द्रको कोटामा प्रदेश प्रमुख बनेका हुन्। गण्डकीका प्रदेश प्रमुख बनेका गुरुङ चितवन कांग्रेसका पूर्वसभापति हुन्।