बागलुङ । बागलुङको गलकोटमा घरेलु मदिरा सेवन गरेर विरामी भएका चार जनाको मृत्यु भएको छ भने थप दुई जनाको अवस्था गंभीर छ । मतक सबै रोल्पाका वासीन्दा हुन् । गलकोट नगरपालिका वडा नम्बर ७ गैराखर्कमा घरेलु मदिरा सेवन गरेका चार जना मजदुरको सोमबार राति मृत्यु भएको हो ।
मृत्यु हुनेमा रोल्पाको सुनिल स्मृती गाउँपालिका(५ का २१ वर्षीय दिपेन्द्र पुन, सोही ठाउँका ३९ वर्षीय दुध बहादुर राना, ५१ वर्षीय रेख बहादुर राना र ३० वर्षीय प्रबिन घर्ती रहेको प्रहरीले जनाएको छ ।
उनीहरु गलकोट बृहत खानेपानी आयोजनामा काम गर्दै आएका थिए । त्यस्तै रोल्पाको सुनिल स्मृती गाउँपालिका-५ गजुलका ३८ वर्षीय खेमराज घर्ती र सोही ठाउँका २६ वर्षीय रबिन्द्र पुनको अवस्था गम्भीर रहेको छ । अहिले उनीहरुको उपचार भईरहेको छ ।
मदिराले मृगौलामा क्षति गरेको देखिएको अस्पताल स्रोतले जनाएको छ । मदिरा बेच्ने होटल सञ्चालकलाई प्रहरीले नियन्त्रणमा लिएको छ ।