असार २७, काठमाडौं । शेयर बजार पुनः लयमा फर्किएको छ । आज दुई दर्जन बढी कम्पनीको मुल्यमा सर्किट लागेको छ ।
आज समग्र बजार अघिल्लो कारोबार दिनको तुलनामा २ दशमलव ६४ प्रतिशतले वृद्धि भएको छ ।
साताको पहिलो कारोबार दिन नेप्से परिसूचक ७३.३३ अंक बढेर २८९८.४३ विन्दुमा पुगेको छ। यस दिन सेन्सेटिभ इण्डेक्स १३.५१ अंक, फ्लोट इण्डेक्स ५.६४ अंक र सेन्सेटिभ फ्लोट इण्डेक्स ५.४५ प्रतिशत बढेको छ।
नेप्सेसँगै यस दिन कारोबार रकममा पनि सुधार देखिएको छ। गत साता दैनिक औषतमा साढे ४ अर्ब कारोबार भएको बजारमा यस दिन ८ अर्बभन्दा बढीको शेयर कारोबार भएको छ। यस दिन २२५ कम्पनीको ८२ हजार ४९ पटकको कारोबारमा ८ अर्ब ६ करोड १३ लाख ८२ हजार रुपैयाँ बराबरको ३ करोड १५ लाख ८८ हजार कित्ता शेयर खरिदबिक्री भएको छ।
नेप्से र कारोबार रकम दुबै बृद्धि भएकाले लगानीकर्ताहरुमा आशाको संकेत देखिएको छ ।
