पोखरा, असार २ । सुपरमादी जलविद्युत आयोजनाका संरचना र सामग्री बाढीले बगाउदा १ अर्ब बराबरको क्षति भएको छ । निर्माण कार्य सकिनै लागेको आयोजनाका संरचना र सामग्री बगाएको सुपरमादी हाइड्रोका कार्यकारी अध्यक्ष पुष्पज्वती ढुंगानाले बताए।
आयोजनाको हेडबक्स (बाँध क्षेत्र) र पावर हाउसमा बाढीले क्षति गरेको उनले बताए ।
कास्कीको मादी गाउँपालिका– १ स्थित मादी नदीमा ३ वर्षअघि सुरू भएको ४४ मेगावाट क्षमताको यस आयोजना यही चैतमा निर्माण सक्ने लक्ष्य राखिएको थियो। कोरोना भाइरसको महामारीका कारण यही असारमा सक्ने भनिएको आयोजना चैतसम्म धकेलिएको थियो।
बाढीले निर्माण सामग्री र संरचना बगाउँदा फेरि तोकिएको समयमा आयोजना सम्पन्न नहुने अवस्था आएको उनले बताए ।
बाढीले इलेक्ट्रो मेकानिकलतर्फ २० करोड र हाइड्रो मेकानिकलतर्फ १२ करोड क्षति गरेको अध्यक्ष ढुङ्गानाले बताए।
बाढीले गिटी, बालुवा, सिमेन्ट, छड लगायतका निर्माण सामग्री २० करोड रूपैयाँ बराबरको बगाएको छ।
यस्तै, आयोजनामा रहेको ३ वटा स्काभेटर, ४ वटा टिपर, ४ वटा डिजल जेनेरेटर गरी २० करोडको क्षति भएको उनले बताए। यस्तै, मिक्स्चर, कंक्रिट पम्पलगायत पनि बगाइदिएको छ।
