पर्सा , २५ बैशाख । बिरगंजमा १२ घन्टामा ३ जना कोरोना संक्रमितको मृत्यु भएको छ । बिरगंजस्थित नारायणी अस्पतालमा उपचाररत ३ जना कोरोना संक्रमितको मृत्यु भएको छ । ज्यान गुमाउने दुइ जना बाराका र एक जना रौतहट जिल्लाका रहेका छन् ।
बैशाख २१ गते गरीएको एन्टिजेन परीक्षणमा पोजेटिभ रिपोर्ट आएका बाराका ४५ वर्षीय पुरुषलाई २२ गते नारायणी अस्पतालमा भर्ना गरिएको थियो । गम्भिर किसिमको निमोनियाबाट समेत ग्रसित उनको शनिवार बिहान साढे १ बजे उपचारको क्रममा मृत्यु भएको नारायणी अस्पतालका कोभिड संयोजक डा। सरोजरोशन दासले जानकारी दिए ।
यसैविच शुक्रवार राति १० बजे अर्का एकजना बाराकै पुरुषको पनि मृत्यु भएको छ । बाराको जितपुर सिमरा उपमहानगरपालिका वडा नम्बर २ निवासी ५५ वर्षीय पुरुषको मृत्यु भएको हो । बैशाख ३ गते भारतको दिल्लीमा गरिएको पिसिआर परीक्षणमा उनको रिपोर्ट पोजेटिभ आएको हो । बैशाख ८ गते नारायणी अस्पतालमा भर्ना भएका ति पुरुष पनि निमोनियाबाट ग्रसित थिए ।
त्यसैगरी रौतहट बैशाख २१ गते गरीएको एन्टिजेन परीक्षणमा पोजेटिभ रिपोर्ट आएका रौतहट ५५ वर्षीय पुरुषलाई २२ गते नारायणी अस्पतालमा भर्ना गरिएको थियो । गम्भिर किसिमको निमोनियाबाट समेत ग्रसित उनको शनिवार बिहान ११ बजेर ४५ मिनेटमा नारायणी अस्पतालमै उपचारको क्रममा मृत्यु भएको नारायणी अस्पतालका कोभिड संयोजक डा। सरोजरोशन दासले जानकारी दिए ।
बिहीबार नै नारायणी अस्पतालमा उपचाररत रौतहटको गौर नगरपालिका २ का ५४ वर्षीय पुरुषको पनि मृत्यु भएको छ । वैशाख २१ गते उपचारका लागि अस्पतालमा भर्ना भएका ती पुरुषमा सोही दिन संक्रमण पुष्टि भएको थियो ।
चैत ३१ देखि वैशाख २५ गते शनिबारसम्म वीरगन्जमा कोरोनाले ६१ जनाको मृत्यु भएको छ । तिमध्ये पर्सा को ३९ जना छन भने ,बारा, रौतहट ,सर्लाही गरि २२ र एक जना भारती नागरिक रहेका छन ।