चैत्र १९ काठमाण्डौं । कार्बाहीमा परेका माधव कुमार नेपालले समानान्तर गतिविधि गतिविधि गरे पछि एमाले अध्यक्ष ओली थप आक्राम बनेका छन् । यस क्रममा ओलीले आज माधव समुहका नेता घनश्याम भुषाल र सुरेन्द्र पाण्डेमाथि कार्बाही गरेका छन् । नेपाल र भीम रावललाई जस्तै भुषाल र पाण्डेमाथि पनि ६ महिना साधारण सदस्यबाट समेत निलम्बन गरेको छ । यसले एमाले भित्र थप विवाद बढ्ने संकेत देखिएको छ ।
एमालेको केन्द्रीय समितिले गत चैत ८ गते चार नेतामाथि स्पष्टीकरण सोधेको थियो । पहिलोपटक सोधिएको स्पष्टीकरणमा पाण्डे र भुसालले जवाफ दिएका थिएनन् ।
फेरि उनीहरूमाथि १६ गते दोस्रोपटक स्पष्टीकरण सोधिए पछि उनीहरुले त्यसको जवाफ १७ गते दिएका थिए । तर, स्पष्टीकरण चित्तबुझ्दो नभएको र सुध्रिने लक्षण नदेखिएको भन्दै एमालेले कारबाही गर्ने निर्णय गरेको हो ।
फागुन २३ गते सर्वोच्च अदालतले नेपाल कम्युनिष्ट पार्टी खारेज गरेर नेकपा एमाले र नेकपा माओवादी केन्द्र व्यूँताइदिएको थियो । एमाले व्यूँतिएलगत्तै अध्यक्ष समूहले नेपाल पक्षमा केन्द्रीय सदस्यलाई नबोलाई एकलौटी निर्णय गरेपछि नेपाल समूहले पनि समानान्तर कमिटी गठन थालेको छ ।