चैत्र १ काठमाण्डौं । नेकपा माओवादी केन्द्रको केन्द्रीय समितिको बैठक आज बस्दै छ । पार्टी केन्द्रीय कार्यालय पेरिसडाँडामा बिहान ११ बजे बस्ने केन्द्रीय कमिटी बैठकले नेकपा एमालेमा गएका नेताहरूलाई कारवाही गर्ने निर्णय हुन सक्ने नेताहरुले बताएका छन् । उनीहरुलाई पार्टी परित्याग गरे नगरेको २४ घण्टा भित्र स्पष्टीकरण दिन र मन्त्रीहरुलाई फिर्ता आउन यस अघि स्थायी समितिको बैठकले निर्देशन दिएको थियो ।
तत्कालीन नेकपा माओवादीका २३ जना नेतालाई नेकपा एमालेले केन्द्रीय सदस्य मनोनित गरेको थियो। उनीहरुलाई पार्टीमा फिर्ता नआए कार्बाहीको तयारी भएको हो ।
यदी पार्टीमा नफर्किए कानुन अनुसार गृहमन्त्री बादल, उर्जा मन्त्री टोप बहादुर रायमाझी, भौतिक योजना मन्त्री प्रभु शाह, उद्योग वाणिज्य मन्त्री लेखराज भट्ट र गौरीशंकर थारुको सांसद पद गुम्ने निश्चित छ ।
साथै बैठकले सत्ता समीकरण र संगठनका बिषयमा समेत थप निर्णय गर्ने संभावना रहेको बुझिएको छ ।