फागुण २० काठमाण्डौं । नेकपाको विवाद समयमै निरुपण गर्न नसकेकोप्रति निर्वाचन आयोगका पाँच जना पुर्व प्रमुख आयुक्तहरुले सँयुक्त विज्ञप्ति निकालेर आफूहरुलाई गंभीर बनाएको भनेका छन् ।
पूर्व प्रमुख निर्वाचन आयुक्तहरु सूर्य प्रसाद श्रेष्ठ, भोजराज पोखरेल, निलकण्ठ उप्रेती,डा. अयोधी प्रसाद यादव र दोलख बहादुर गुरुगंले सयुक्त विज्ञप्ति जारी गरेका हुन् ।
उनीहरुले दलको विवाद निरुपणमा भएको ढिलाईले निर्वाचन आयोगको निर्णय क्षमता र स्वायत्ततामा प्रश्न उठाईएकाले आफूहरु गंभीर भएको बताएका हुन् ।
उनीहरुले दल सम्बन्धि विवाद निरुपणमा ढिलाई गर्दा निर्वाचन आयोगको साख र राजनीतिक प्रकृयामा पार्न सक्ने गाम्भिर्यतालाई ध्यानमा राखेर प्रचलित कानुन र स्थापित नजिरहरुका आधारमा उपयुक्त निर्णय यथाशीघ्र दिन उनीहरुले माग गरेका छन् ।
यस अघि संसद विघटन पछि सर्वोच्चमा परेको रिट निवेदनका बारेमा बहस चलिरहेका बेला सर्वोच्चका चार जना पूर्व प्रधानन्याधीशले दिएको सँयुक्त विज्ञप्ति जस्तै कोणबाट यो वक्तव्यलाई हेरिएको छ ।
पूर्व एमाले निकट मानिएका वर्तमान प्रमुख निर्वाचन आयुक्त दिनेश थपलियाले नेकपाको विवाद निरुपणलाई आलटाल गरेको आरोप लाग्दै आएको छ ।
पार्टीको आधिकारीकता सम्बन्धि विवाद आयोगले टुंगो नलगाउदा नेकपाको विभाजनको कानुनी पाटो सुल्झिएको छैन भने फागुण २३ गतेदेखि चल्ने संसदमा समेत समस्या पर्न सक्ने देखिएको छ ।
निर्वाचन आयोगको भूमिकाप्रति नेकपा प्रचण्ड माधव समुहले असन्तुष्टी प्रकट गर्दै आएको छ । विगतका नजिरहरु हेर्दा पार्टी केन्द्रीय समितिमा बहुमत रहने दललाई आधिकारीकताको मान्यता दिने गरिएको थियो ।
