फाल्गुण १८, काठमाडौं । नेपाल पर्यटन बोर्डको सञ्चालक समिति उपाध्यक्षमा चन्द्र रिजाल नियुक्त भएका छन् । २०६५ साल मंसिर २२ गतेदेखि खाली रहेको नेपालको पर्यटन क्षेत्र हेर्ने र बजारिकरण गर्ने उद्देश्यले निर्माण गरिएको पर्यटन बोर्डको उपाध्यक्षमा मंगलवार बसेको बोर्डको बैठकले रिजाललाई चयन गरेको हो ।
गत माघ २३ गते मन्त्रिस्तरीय बैठकको निर्णयबाट रिजालसहित ङावा ङिमा शेर्पा र कृष्ण शाह सञ्चालक समिति सदस्य नियुक्त भएका थिए । बोर्डका अन्य सदस्य विप्लव पौडेल र पम्फा धमलासहित सबैको सर्वसम्मतिमा रिजालाई उपाध्यक्ष चयन गरिएको हो।
निजी क्षेत्रबाट नियुक्त हुने पाँच जनामध्ये पौडेल र धमलालाई यसअघि नै स्वर्गीय पर्यटनमन्त्री रवीन्द्र अधिकारिले नियुक्त गरेका थिए । नेपालको पर्यटनलाई विश्वबजारमा चिनाउने हेतुले निर्माण गरिएको यस संस्थामा वार्षिक डेढ अर्बदेखि २ अर्ब बजेट हुन्छ ।
सदस्यबीचकै बिवाद तथा खिचातानीले गर्दा पर्यटन बोर्डमा १० वर्षदेखि उपाध्यक्ष पद खाली थियो । यसपटक सर्वसम्मत रुपमा पर्यटन बोर्डले उपाध्यक्ष चयन गरेको हो । टानका पूर्व अध्यक्ष समेत रहेका व्यवसायी रिजालले सर्वसम्वत उपाध्यक्ष चयन भएसँगै बिगतका जस्ता राजनीतिक खिचातानीमा अब बोर्ड छैन भन्ने सन्देश समेत दिन आफूहरु सफल भएको बोर्ड सदस्य शाहले बताए।
निजी क्षेत्रको तर्फबाट बोर्डमा प्रतिनिधित्व गर्ने चारैजना सदस्यले संयुक्त रुपमा रिजाललाई उपाध्यक्ष बनाउने प्रस्ताव गरेका थिए। बोर्डको कार्यकारी निर्देशकमा डा.धनन्जय रेग्मी छन्।
उपाध्यक्षमा निर्वाचित भएका रिजाल पर्यटन क्षेत्रमा संगठन निर्माणदेखि पर्यटनका विज्ञका रुपमा चिनिन्छनन् । धादिङ खाल्टे ३ घर भई लामो समयदेखि नेकपा एमालेको राजनीतिमा होमिएका रिजाल होटल व्यवसायीहरुको छाता संगठन हानको केन्द्रीय सदस्य, ट्रेकिङ एजेन्सिज एसोसियज नेपाल टानका अध्यक्ष, पर्यटन व्यवसायीहरुसँग जोडिएको सहकारी दीगो पर्यटनको अध्यक्ष, नेपाल ओलम्पिक कमिटी अन्तर्गत रहेको संस्था नेपाल र्याफ्टिङ तथा क्यानोइङ संघको अध्यक्ष जस्ता पर्यटन क्षेत्रमा आवद्ध रहेको दर्जनभन्दा बढी संघ संस्थामा नेतृत्वदायी भुमिकामा रहेका छन् ।
