फागुण १७ काठमाण्डौं । हिजो केही सुधार देखिएको शेयर बजारमा आज फेरी पहिरो गएको छ ।
गत केहि दिनदेखि लगातार घट्दै आएको शेयर बजारमा सोमबार करिब ४१ अंकको सुधार देखिएको भए पनि आज ५९.७० अंकले पुनः ओरालो लागेको हो ।
नेप्से अहिले २४५५.३३ विन्दुमा झरेको छ भने सेन्सेटिभ इन्डेक्स पनि ९.८० अंकले घटेर ४४३ विन्दुमा झरेको छ।
यस दिन २०८ वटा कम्पनीको १ करोड ३१ लाख ६ हजार ७३८ कित्ता शेयर ६ अर्ब ११ करोड ९६ लाख ३८ हजार ६६९ रुपैयाँमा खरिद बिक्री भएको छ।
यस दिन कारोबारमा आएका १३ वटा उपसमूहमध्ये व्यापार र होटल उपसमूहको सूचक सकारात्मक देखिएको छ भने बाँकी ११ वटा उपसमूहको सूचक घटेको छ।
घट्दो बजारमा मंगलबार साल्ट ट्रेडिङ कर्पोरेशन र चन्द्रागिरी हिल्सको शेयर भने सकारात्मक सर्किट लेभलमा कारोबार भएको छ। त्यस्तै, हिमालयन पावर पार्टनरको शेयरमूल्य पनि ८ प्रतिशतभन्दा धेरैले बढेको छ।
यस दिन एशियन लाइफ इन्स्योरेन्सको सबैभन्दा धेरै २८ करोड २६ लाख रुपैयाँ बराबरको शेयर कारोबार भएको छ भने नेपाल इन्फ्रास्ट्रक्चर बैंकको २५ करोड ८७ लाख, नेपाल बैंकको २२ करोड ६९० लाख, शिखर इन्स्योरेन्सको २१ करोड ६९ लाख र कुमारी बैंकको २० करोड ४८ लाख रुपैयाँ बराबरको शेयर कारोबार भएको छ।
