पछिल्ला दिनहरुमा निरन्तर ओरालो लागेर लगानीकर्तालाई निराश बनाएको नेप्से परिसुचकमा आज आशाजनक बृद्धि भएको छ । आज भएको बृद्धिले लगानीकर्ताहरुलाई केही उत्साह थपेको देखिएको छ । तर कतिपय लगानीकर्ताले नेप्से अझै केही माथि जाने अपेक्षा गरेका छन् ।
सोमबार नेप्से परिसूचक ४०.६४ अंक बढेर २५१५.३ विन्दुमा पुगेको छ। त्यसैगरी, यस दिन सेन्सेटिभ इण्डेक्स ६.४७ अंक, फ्लोट इण्डेक्स २.८४ अंक र सेन्सेटिभ फ्लोट इण्डेक्स २.१५ अंक बढेको छ।
नेप्से उकालो लागेपनि यस दिन भोल्यूम अर्थात कारोबार रकम भने घटेको छ । यस दिन बजारमा २०९ कम्पनीको ७० हजार ३३९ पटकको कारोबारमा ५ अर्ब ६९ करोड २३ लाख रुपैयाँ बराबरको १ करोड १८ लाख ३८ हजार कित्ता शेयर कारोबार भएको छ। यो कारोबार रकम यस अघिको तुलनामा कमी हो ।
यस दिन कारोबारमा आएका १३ वटै उपसमूहका परिसूचकहरु बढेका छन् । जसमध्ये व्यापार उपसमूहको परिसूचक सर्वाधिक ३।३२ प्रतिशत बढेको छ। त्यसैगरी, यस दिन होटल तथा पर्यटन, वित्त र जीवन बीमा उपसमूहको परिसूचक २ प्रतिशतभन्दा बढी बढेको छ भने बैंकिङ्ग, विकास बैंक, जलविद्युत, निर्जीवन बीमा, उत्पादन तथा प्रशोधन, अन्य, लघुवित्त र लगानी उपसमूहको परिसूचक १ प्रतिशतभन्दा बढी बढेको छ।
कारोबार रकमका आधारमा यस दिन नेपाल इन्फ्रास्ट्रक्चर बैंक लिमिटेड शीर्ष स्थानमा रहेको छ। सो बैंकको यस दिन ४४ करोड ४८ लाख रुपैयाँ बराबरको शेयर खरिदबिक्री भएको छ। त्यसैगरी, यस दिन शिखर इन्स्योरेन्सको ३० करोडा रुपैयाँभन्दा बढीको शेयर कारोबार भएको छ।
कारोबारमा आएको चन्द्रागिरी हिल्सको शेयरमूल्य यस दिन पनि सकारात्मक सर्किट लेभलमा कारोबार भएको छ। सो कम्पनीको शेयरमूल्य यस दिन ४१ रुपैयाँ बढेर ४५५ रुपैयाँमा अन्तिम कारोबार भएको थियो।
