माघ २२ काठमाण्डौं । जसपा संघीय परिषद्का अध्यक्ष डा. बाबुराम भट्टराईले संसद विघटन र संवैधानिक निकायमा नियुक्ति जस्ता विषयमा प्रतिपक्षी दलहरुले शसक्त आन्दोलन नगरेकोमा गंभीर आपत्ति जनाएका छन् ।
भट्टराईले ट्वीटर मार्फत भनेका छन्, ओली-विद्या संविधान र लोकतन्त्रको हत्या गरिरहने तर प्रतिपक्षी दलहरू चुनाव र सत्ताको र्याल काडेर बसिरहने हो भने भोलि इतिहासले ओलीविद्यालाई कम प्रतिपक्षी दलहरूलाई बढी दोषी ठहर्याउनेछ , फासिवादको बादल मडारिइरहेको वेला प्रतिरोध नगरी उपदेश छाटेर बस्नेहरूको हिसाब पनि इतिहासले राख्नेछ ।
भट्टराईले चुनाव होला र ठूलो भाग खाँउला भन्ने आशा नगरी लोकतन्त्रको रक्षाका लागि आन्दोलनमा आउन यस अघि पनि आग्रह गर्दै आएका थिए ।
काँग्रेसले संसद विघटन बिरुद्ध केन्द्रीकृत आन्दोलन गरेको छैन भने संवैधानिक निकायमा नियुक्तिको विषयमा पनि मौनता साँधेको आरोप लागेको छ ।
