२ माघ, काठमाडौं । थानकोट–नागढुंगा सिस्नेखोला सुरुङमार्गको काठमाडौँ तर्फबाट आज पूजाआजा गरी सुरुङ खन्ने काम सुरु हुँदैछ ।
सुरुङमार्ग निर्माणको जिम्मा पाएको जापानी कम्पनी हाज्मा आन्दो कर्पोरेसनका इन्जिनियरले निर्माणस्थलमा विशेष पूजा गरी आजदेखि सुरुङ खन्ने तयारी गरेका हुन् । सुरुङ खन्न आज सुरुङको मुखमा स्टिलको ढोका स्टिल रिब्स राखिंदैछ ।
यसअघि धादिङतर्फबाट भने गत महिना नै सुरुङ खन्ने काम सुरु भइसकेको छ । धादिङतर्फको सुरुङ खन्ने काम पुस ८ गते सुरु भएको थियो । धादिङतर्फको सुरुङ २३ मिटर खनिएको छ । काठमाडौँ तर्फको सुरुङमार्गको मुख चन्द्रागिरि नगरपालिकाको टुटीपाखामा पर्छ भने धादिङतर्फको मुख धुनीबेँसी नगरपालिकाको सिस्नेखोलामा रहेको छ ।
कोरोना भाइरसको महामारी तथा स्थानीयवासीको अवरोधका कारण निर्धारित कार्यतालिकाभन्दा ढिलो सुरु भएको थानकोट–नागढुंंगा–सिस्नेखोला सुरुङमार्ग निर्माणले अब भने गति लिने बिश्वास गरिएको छ ।