काठमाडौं पुष २३। पछिल्लो समय सुधार भएको शेयर बजार निरन्तर उकालो लागेर ऐतिहासिक रेकर्ड बनाएको छ । आज दोहोरो अंकले बढ्दै नेप्से २२०० बिन्दु छेउ पुगेको छ ।
बिहीबार सेयर बजार सूचक १५ अंकले बढेर २१९४ बिन्दुमा पुगेको छ। पछिल्लो राजनीतिक अस्थीरतालाई चिर्दै शेयर बजारले ऐतिहासिक रेकर्ड बनाएको हो ।
बिहीबार अधिक दरले मूल्य बढ्नेमा मल्टिपर्पोज फाइनान्स, मिर्मिरे माइक्रोफाइनान्स, आइएमई जनरल इन्स्योरेन्स, नारायणी डेभलोपमेन्ट बैंक र प्रभु लाइफ इन्स्योरेन्स रहे । यी कम्पनीहरुको सेयर मूल्य १० प्रतिशतले बढेको छ।
सर्वाधिक कारोबार हुने कम्पनीमा भने प्रभु बैंकले सबैलाई उछिनेको छ। बैंकको ३१ करोड रुपैयाँको सेयर किनबेच हुँदा नेपाल पुनर्बिमा कम्पनीको २७ करोड, चिलिमे हाइड्रोपवारको २४ करोड, नेपाल लाइफको २३ करोड र एनआइसी एसिया बैंकको २२ करोड रुपैयाँको कारोबार भएको छ।
आज साताको अन्तिम कारोबार दिन २०८ कम्पनीको ५ अर्ब ८७ करोड रुपैयाँबराबरको एक करोड १७ लाख कित्ता सेयर किनबेच भएको नेप्सेले जनाएको छ ।
