पुष १५ काठमाण्डौं । राजनीतिक अस्थीरताका बीच ओरालो लाग्ने अनुमान गरिएको शेयर बजार आज पनि उकालो लागेको छ ।
साताको चौथो कारोबार दिन बुधबार नेप्से सूचक साढे दुई प्रतिशतले बढेको छ भने कारोबार रकम पनि साढे ४ अर्ब हाराहारी रहेको नेप्सेले जनाएको छ ।
यस दिन नेप्से सूचक ४९.१७ अंक अर्थात २.४४ प्रतिशतले बढेर २०६२ विन्दुमा पुगेको छ। यसअघि नेप्सेले २०७१ विन्दुको हालसम्मकै नयाँ उचाईमा पुगेको थियो ।
बुधबार २०८ वटा कम्पनीको ९९ लाख १० हजार कित्ता शेयर ४ अर्ब ४४ लाख रुपैयाँमा खरिद बिक्री भएको नेप्सेले जनाएको छ । आज दुई उपसमूहको सूचक नकारात्मक देखिँदा अन्य १० वटा उपसमूहको सूचक सकारात्मक रह्यो ।
बुधबार कारोबारमा आएका पाँच कम्पनीको शेयर सकारात्मक सर्किट लेभलमा कारोबार भएको छ। साल्ट ट्रेडिङ कर्पोरेशन, नागरिक लगानी कोष, हिमालयन डिस्टिलरी, मल्टिपर्पस फाइनान्स र एभरेष्ट बैंकको अग्राधिकार शेयरको मूल्य ९ प्रतिशतभन्दा धेरैले बढेको छ ।
बुधबार शिवम् सिमेन्टको सबैभन्दा धेरै ३४ करोड ४४ लाख रुपैयाँ बराबरको शेयर कारोबार भएको छ भने एनआइसी एशियाको ३२ करोड २३ लाख, हिमालयन डिस्टिलरीको २८ करोड ६७ लाख र नेपाल लाइफ इन्स्योरेन्सको २७ करोड ५४ लाख रुपैयाँ बराबरको शेयर कारोबार भएको छ।
