असोज १५ काठमाण्डौं । बैंक तथा वित्तीय संस्थाहरुले धमाधम लाभांसको घोषणा गर्न थालेका छन् । यस क्रममा माछापुच्छ्रे बैंकले १०.४ प्रतिशत लाभांश दिने भएको छ । यो प्रस्ताव पारित गर्न बैंकले साधारण सभा बोलाएको छ । बैंकले कात्तिक ६ गते, बिहीबार बाइसौँ साधारण सभा गरी उक्त प्रस्ताव पारित गर्ने तयारी गरेको छ । साधारण सभा पोखरामा हुने छ ।
सभाले शेयरधनीहरुलाई चुक्ता पूँजीको ७.०३ प्रतिशत अर्थात ५९ करोड ४६ लाख १६ हजार ९३१ रुपैयाँ बराबरको बोनस शेयर वितरण गर्ने विशेष प्रस्ताव पारित गर्नेछ। यसका साथै, ३.७३ प्रतिशतका दरले बोनस तथा नगद लाभांशमा लाग्ने कर सहित २८ करोड ५० लाख ६४ हजार ७४४ रुपैयाँ बराबरको नगद लाभांश वितरण गर्ने प्रस्ताव पनि पारित गर्नेछ।
सभाले मर्जर, एक्जिसन या वैदेशिक रणनीतिक साझेदारीमा जान उपयुक्त देखिएमा पनि सो सम्बन्धि निर्णय गर्ने जिम्मा सञ्चालक समितिलाई दिने छ ।
साधारण सभा तथा लाभांश वितरण प्रयोजनार्थ बैंकले असोज २२ गते शेयर दाखिल खारेजको दर्ता बन्द गर्ने भएको छ। यस्तै बैंक अफ् काठमाण्डौंले पनि लाभासंको घोषणा गरेको छ । बैंकले चुक्ता पूँजीको १३ प्रतिशतका दरले हुने रकम १ अर्ब ११ करोड १२ लाख ८९ हजार १४ रुपैयाँ बराबरको बोनस शेयर र ३ प्रतिशतका दरले हुन आउने रकम २५ करोड ६४ ६ हजार ६२२ रुपैयाँ नगद लाभांश (कर सहित) वितरण गर्ने प्रस्ताव गरेको छ।
असोज १४ गते बसेको बैंकको १६४ औँ सञ्चालक समितिको बैठकले सो दरमा लाभांश वितरण गर्ने निर्णय गरेको हो। नेपाल राष्ट्र बैंकबाट स्वीकृत भइ आगामी वार्षिक साधारण सभाबाट पारित भएपश्चात सो लाभांश शेयरधनीहरुले पाउने छन् ।
