एजेन्सी, १७ भदौ । चर्चित ब्राजिलका फुटबल खेलाडि नेयमारलाई कोारेना संक्रमण भएको छ । फ्रान्सेलि फुटबल क्लब पेरिस सेन्ट जर्मनले नेयमारसहित तीन जना खेलाडिमा संक्रमण पुष्टि भएको जनाएको छ । नेयमारले हालै मात्र यूएफआ च्याम्पियनसिप खेलेका थिए ।
पीएसजीले बुधबार एक विज्ञप्ति जारी गर्दै तीन खेलाडीमा कोरोना संक्रमण भएको बताए पनि खेलाडीको नाम सार्वजनिक गरेको थिएन ।
तर, फ्रान्सेली सञ्चारमाध्यमले क्लब स्रोतलाई उदृत गर्दै नेयमारसहित अर्जेन्टिनी मिडफिल्डरद्वय एन्जल डी मारिया र लिआन्ड्रो पारेडेसलाई कोरोना संक्रमण भएको जनाएका छन् ।
नयाँ सिजनका लागि खेलाडीहरुको क्लोज क्याम्प अगाडी परीक्षण गरिएको थियो । त्यस क्रममा तीन जना पीएसजीका खेलाडीमा कोरोना संक्रमणको पुष्टि भएको हो । उनीहरुलाई स्वास्थ्य प्रोटोकल अनुसार आइसोलेसनमा राखिएको क्लबले जानकारी दिएको छ ।
फ्रान्सेली लिगको नियम अनुसार अब पिएसजीको लिग खेल पनि स्थगित हुने सम्भावना बढेको छ । ८ दिनको अन्तरमा ४ भन्दा बढी खेलाडीमा कोरोना संक्रमण देखिए खेल स्थगित गर्नुपर्ने लिगको नियम छ ।
युरोपियन च्याम्पियन्स लिगको फाइनलमा बायर्न म्यूनिखसँग पराजित भएको पीएसजीले लिग वानको नयाँ सिजनको तयारीमा छ । पीएसजीको पहिलो खेल सेप्टेम्बर १० मा रहेको छ ।
