एजेन्सी ।
युरोपा लिगको उपाधि स्पेनिस क्लब सेभियाले जितेको छ। गएराती भएको खेलमा स्पेनिस क्लब सेभियाले इटालियन क्लब इन्टर मिलानलाई ३-२ गोलले पराजित गर्दै युरोपा लिगको उपाधी जितेको हो ।
खेलको पहिलो हाफ २-२ गोलको बराबरीमा सकिएको थियो । खेलको दोस्रो हाफमा इन्टरका रोमेलु लुकाकुले आत्मघाती गोल गरेपछि सेभियाले अग्रता पाएको थियो ।
त्यसअघि लुकाकुकै गोलमा इन्टरले पहिले अग्रता लिएको थियो। खेलको पाँचौ मिनेटमा सेभियाका डिफेन्डर कार्लोसले फल गरेपछि पाएको पेनाल्टीमा लुकाकुले गोल गरेका थिए।
१२ मिनेटमा सेभियाका लुक डे जोङले जेसस नाभासको क्रसमा बराबरी गोल फर्काए। ३३ मिनेटमा डे जोङले व्यक्तिगत दोस्रो गोल गर्दा सेभियाले २-१ को अग्रता लियो। त्यस लगतै इन्टरका डिएगो गोडिनले ३५ मिनेटमा गोल गदै खेललाइ २-२ गोलको बराबरीमा ल्याएका थिए ।
दोश्रो हाफको ७४ मिनेटमा सेभियाका डिफेन्डर डिएगो कार्लोसको प्रहारलाई रोक्ने क्रममा लुकाकुले आफ्नै पोस्टमा गोल गर्न पुगेका थिए । त्यसपछि खेलको नतिजा ३-२ मा सिमीत रह्यो ।
छैटौं पटक युरोपा लिगको च्याम्पियन बन्दै सेभियाले युरोपा लिग सर्वाधिक जित्ने क्लबको इतिहास रचेको छ ।
